uMthunywa
Thokozile Mbedzi
ZILOKHU zinkemile izakhamizi zesigabeni seMuringani eMasvingo ngemva kokuba esinye isalukazi esileminyaka elikhulu sitshe safa endlini.
UKurauwone Ndashava (100) kubikwa utshe mhlaka 3 Mpandula elele.
Kuzwakale ukuthi indodakazi kamuyi eleminyaka engu-57 uSadoc Torovaseyi Kurawuzviwone oleminyaka engu- 57 wakhupha umlotha phandle eselungisela ukupheka kwalumatha engananzeleli.
Ekhuluma lentatheli kaMthunywa uMnumzana Norman Moyo uthe behlelwe yisiga esibuhlungu esigabeni sabo.
“Sehlelwe yisiga esibuhlungu esigabeni sethu njalo kunzima lokukhuluma ngakho. Ugogo ubesekhulile eseleminyaka engu-100 kusuke kwaba buhlungu ukuthi usuke walandwa yingozi yomlilo watshela endlini wafa.
“Umntanakhe ubeselungiselela ukupheka ukudla kwantambama lapho akhupha khona umlotha phandle. Uthe esesemkulwini wezwa kudubuka wathi ephuma phandle wathola sokusitsha izithungo zotshani eceleni kwendlu kagogo wazama ukucitsha kwabuya abantwana ababili abaleminyaka engu-16 loyedwa oleminyaka engu-14 kodwa wabehlula umlilo,” kutsho uMnu Moyo.
“Besacitsha utshani bezwa ugogo ehlaba umkhosi bathi bethi mehlo suka babona indlu kagogo layo isisitsha, ngokusweleka kwenhlanhla ugogo wahle watshela phakathi njalo akula okwaphumayo kuleyondlu. Silusizi ngoba umuntu omdala uhambe ngendlela ebuhlungu kakhulu,” kulandisa uMnu Moyo.
Isikhulumi samapholisa esabelweni seMasvingo uInspector Kudakwashe Dhewa ebuzwa ngodaba lolu uthe basaluphenyisisa.
“Udaba lukagogo oleminyaka engu-100 solufikile ehofisini yethu njalo sisaluphenyisisa,” kuphetha uInsp Dhewa.
