uMthunywa
Ukusetshenziswa kwesabizwana sokukhomba emitshweni
1. NJENGEZINYE izabizwana singandulela ibizo emutshweni: Lesi isigqoko sihle. Le inkomo izahlatshwa.
Lo umuzi wakhiwe kuhle.
Kumutsho wokuqala isabizwana sokukhomba eduze u/lesi/ sandulela ibizo isigqoko.
Kumutsho wesibili isabizwana sokukhomba eduze u/le/ sandulele ibizo inkomo. (Nanzelela ukuthi unkamisa wakuqala webizo angeqiwa).
2. Singalandela ibizo emutshweni: Izicathulo lezi ziyadula. Isabizwana sokukhomba eduze u/lezi/ silandela ibizo izicathulo. Isikolo lesi silabantwana abalutshwana.
3. Singaba yinhloko emutshweni: Leyo inkomo kumele ithengiswe. Lokhu kudla kumnandi.
Kumutsho wokuqala isabizwana sokukhomba u/lezo/ yinhloko yomutsho.
Isabizwana sokukhomba /lokhu/ siyinhloko yomutsho.
4. Singaba ngumenziwa emutshweni. Kuxotshwe labaya.
U/labaya/ yisabizwana sokukhomba kude esingumenziwa kulo umutsho.
Abafana bayenqanda leziya. U/leziya/ yisabizwana sokukhomba kude esingumenziwa emutshweni lo.
5. Singalandela ezinye izabizwana emutshweni: Qhuba zona lezi izimvu. U/lezi/ yisabizwana sokukhomba eduze.
Lapha silandela u/zona/ oyisabizwana soqobo. Sonke lesi uzasiqeda? U/lesi/ yisabizwana esikhomba eduze eilandela isabizwana senani u/sonke/.
Isabizwana senani
Umbuzo esiwuphendulayo ekuqaleni kwalesi sifundo ngothi: Siyini isabizwana senani?
Isabizwana senani simela ibizo emutshweni njengezinye izabizwana.
Sizaqala lapha kuviki ezayo.
