uMthunywa
Ngeviki ephelileyo sifunde ngokwakhiwa kwesabizwana sokukhomba buqamama sona esisuselwa kusabizwana sokukhomba eduze.
Lokhu kwenzakala kanje: lo + o > lowo; le + o > leyo; la + o > lawo. Uma izabizwana zokukhomba eduze zilamalunga amabili, sijobelela u “o” bese kuthi unkamisa wesabizwana asuke ededela isakhi “o”.
Isibonelo: leli + o > lelo; lolu + o > lolo; lobu + o > lobo.
Ukwakhiwa kwesabizwana sokukhomba kude
Laso sisuselwa esabizwaneni sokukhomba eduze ngokujobelelela u-ya loba u-waya. Izibonelo: lesi > lesiya; lezi > leziya, le > leya. Isijobelelo u-waya usetshenziswa ezabizwaneni u lo, laku la. Izibonelo: lo > lowaya; la > lawaya.
Ukusetshenziswa kwesabizwana sokukhomba: Siyasebenza silandele ibizo emutshweni. Izibonelo: Intaba leyo ibhidlikile. Izingoma lezi ngezikaSkhuza. Kumutsho wokuqala isabizwana sokukhomba buqamama /leyo/ silandela ibizo intaba. Kumutsho wesibili isabizwana sokukhomba eduze /lezi/ silandela ibizo izingoma.
Singandulela ibizo emtshweni, kodwa kuvame ukuba unkamisa wokuqala webizo eqiwe uma isabizwana silandulela ibizo. Izibonelo: Leziya zindlu zifulelwe kuhle. Loluya khuni aluthezwa. Sizayithathela lapha lindaba yesabizwana sokukhomba.
