Iqoqo lezinkondlo….Ugwalo ludindwe yiLongman Zimbabwe

25 Aug, 2022 - 00:08 0 Views
Iqoqo lezinkondlo….Ugwalo ludindwe yiLongman Zimbabwe

uMthunywa

Indikimba – Ezomanyano

Imbongi nguSibangilizwe P Jubane

Isihloko senkondlo – Mkhulu lowo mbiko

Lamhlanje siqhubeka ngenkondlo le esiyiqale kuviki edluleyo emayelana lombiko omkhulu owabakhona kulizwe lakithi ubika ukumanyaniswa kwesizwe sakithi ngamabandla ezombusazwe amabili i(PF-Zapu) leZanu-PF kubunjwa ibandla elilodwa leZanu-PF. La amabandla yiwo ayekhokhele impi yenkululeko yelizwe leZimbabwe.

Ukudonselana lokungezwani kwabo kusanda kubuya uzibuse kwaletha uthuthuva olukhulu Phakathi kwesizwe ngoba kulemphefumulo yabantu abanengi eyachithekayo ngaleso sikhathi sokuhlakazeka.

Yikho nje lapha sokufika ukuthi mabandla lawo akhethe ukuthula kulokulwa lowo mbiko wezwakala eduze lakhatshana. Wabangumbiko omkhulu lowo owathokozelelwa ngabantu abanengi kakhulu.

Sibonile ngeviki ephelileyo okunye okwenzakalayo sokufike lowo mbiko kuZulu.

Siyaqala lapha linkondlo imbongi isitshela ukuthi: “Mkhulu lo umbiko owabikwa kwelakithi”.

Iyaqhubeka imbongi ithi umbiko lowo omkhulu wabikwa ngolimi lwakithi. Lowo mbiko wemukelwa yizizwe lezizwana zona ezawusakaza ngendimi zazo esingazizwayo waze wasakazeka phansi. Lowo mbiko wemukelwa ngabaphansi (amadlozi phela) imbongi ethi awuzwa ngolwabo ulimi. Esewuzwile lowo mbiko amadlozi athi atshelana ngolimi lwawo.

Kasimadlozi wodwa awuzwayo lowo mbiko kodwa lamaqhawe akithi phansi lawo kuthiwa awuzwa lowo mbiko ngoba lawokuthiwa ayesesazi ulimi lwaphansi. Wona-ke kuthiwa akhuluma labokhokho abaphansi ukuze basithethelele lathi thina esesalahla amazil’emvelo. Kuthiwa sadela ukumba amathuna kodwa salahla abantu emathuneni. Iyagcizelela imbongi ithi, “Mkhulu lowo mbiko/Owabikwa ngalelo langa”. Lowo mbiko kuthiwa wabikelwa ilizwe lonke lomhlaba wonke, ubikelwa abantu bonke bona abezwayo labangezwayo.

Umbiko lo wawuqonde wonke wonke umuntu, iziphofu kunye lababonayo, izimungulu kanye labakhulumayo. Izigoga lazo zabikelwa kwathi abaphilayo bonke labafileyo bezwa ukuthi inkulumo zomanyano ziphelile. Mkhulu lowo mbiko, iyagcizelela imbongi wona owathi lezo zinkulumo ziphelile.

Ziphele ngesivumelwano lokubhalelana phansi amagama. Amagama lawo ayefakaza leso sivumelwano sona kuyisivumelwano sokuqeda uhlupho.

Lolo kwakuluhlupho lokungavumelani lokungathembani, ukungahlalisani, ukungakhulumisani lokwesabana.

Kwakuluhlupho lokungalalelani lokungakhumisani lasibi somlotha wona wodwa ongathengwayo, lokulwisana kwasibi sabantwana bandlu-nye bona ababedlephana samanina esithembo. Iyaphinda imbongi isitshela ukuthi mkhulu lowo mbiko wona owabika isivumelwano somanyano. Isivumelwano esiyinsika yokubumba isizwe.

Sizama lapha khathesi siyiphethe kuviki ezayo linkondlo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds