Iqoqo lezinkondlo: Giya Mthwakazi

25 Apr, 2019 - 00:04 0 Views
Iqoqo lezinkondlo: Giya Mthwakazi

uMthunywa

KUVIKI ephelileyo sihlaziye inkondlo engaphansi kwendikimba ethi: Ezothando.

Lamhlanje sizahlolisisa le eyalotshwa nguReverend P B Damasane ethi: Babuthiwe. Okokuqala sibalombuzo othi ngobani labo ababuthiweyo njalo bebuthwa ngaphi?

Imbongi nxa iphosa ilihlo imangaliswa yikuthula okukhona edolobheni lakoBulawayo ngesikhathi santambama khona kumele ukuthi aluba abantu bayaxokozela bethokoza.

Lamhla nxa ithi iyakhangela kuthule kuthe cwaka! Isenzukuthi lesi u-cwaka siveza ukuthi ukuthula okukhona kungaphezulu.

Kubetha umoya lemavinkilini lapho okumele ukuthi aluba kuphithizela abantu abanengi.

Nxa izinto zihamba kuhle kumele ukuthi aluba kugcwele isinyotho sabantu. Isimanga yikuthi ngalolu suku kubetha umoya.

Iyamangala imbongi ukuthi bayengaphi abantu kulomnyama omkhulu kangaka.

Imbongi ikhangela enye yezindawo lapho okunathelwa khona, ihotela ethiwa yiWevali kutshaya ibhungayezi okutsho ukuthi kuthule cwaka ngoba kungela bantu.

Imbongi iyabuza ukuthi bayengaphi abantu. Ikhangele ePlaza imbongi layo ibone okufanayo. Kuthule zwi ibhungayezi liyabetha lakho.

OSotshukela ababebonakale befuqazela ngezisu  belezidandane omama abanathayo, kukhanya ngalolusuku bafuqazela bebodwa ngoba omama labo abazifuquzela belazo kabakho lamhlanje.

Kwenzenjani, bayengaphi labo mama? OSotshukela baswele lona itshukela lantambama.

Iyababaza imbongi ithi, “Yeyeni bant’bayengaphi? Kwakusaselezinye indawo zokunathela okwakuthiwa ngoShirichena. Lazo ngalelolanga lezondawo zazomile zingela bantu. Obaba abanatha lapho labo banatha nzima bengela baphelekezeli, omama labo abahlangana labo ntambama.

Izingoma ezazigidwa ngaleso sikhathi oStimela saseZola eyahlatshelwa nguMbongeni Ngema zazigidwa zinsizwa zodwa ngoba bengekho ngalelo langa.

Insizwa lezi ezigidayo lazo zomile lanxa zinathile utshwala. Zomele bona omahotsha labo abajayele ukugida labo.

Omaqeda iphango kabakho. Liphango lani leli? Imbongi iyawabuza amadoda ukuthi kambe nga kutheni esenza izinto angaziqhelanga?

Iyabuza ithi, “Wahamba wedwa nje Ndoda kutheni? Wembatha wedwa kulomqando onje yindaba? Akusimpelanyanga na ungabambanga?” Iphetha ngokubuza imbongi ukuthi kambe kutheni bakwethu, kwenzenjani?

Kwenzakale izinto ezingajayelekanga ngoba kukhanya kulabantu abangekhoyo.

Iqhubekela phambili imbongi isibuza uBulawayo ngokwakhe ukuthi kungani ekhanya emsulwa ngoba seyehlulekile ukuthola impendulo yemibuzo yayo.

Iyaqhubeka ibuza uBulawayo ukuthi kwenzenjani lezitalada zakhe zikhanya zingelazidandane, izintombi phela.

Abanathayo babunile ngoba imbongi ithi kungani banethiwe. Umbuzo ujinga ulokhu usithi, “Kutheni?” Sekulempendulo ekhona ethi, “Utsho laba abasibhuda?  Ovulangapha bavale ngale. Abadla njengewobo”.

Amazwi la atshengisa inzondo imbongi elabo kulaba bantu besifazana abangaziphathanga.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds