Ethel Ncube
KUZAFIWA koNtuthu kuyonale iviki ngoLwesihlanu lapho okuzabe kudibene uMellisa ovela eCanada, Nkwali kanye leqembu leZimnyama kuthakazelelwa iWorld Music Day.
Umcimbi weWorld Music Day uqoqwe yi-Alliance Francaise De Bulawayo bebambene le-The French Embassy of Zimbabwe.
Iphephandaba likazulu lixhumane lomqondisi weqembu leZimnyama uPhibion Ncube obike ukuba bazabe bejabulisa emcimbini lo okhangelelwe ngabantu abanengi.
“Okokuqala sithanda ukubonga ukuba simenywe emcimbini lo omkhulu kangaka lathi ukuthi sizohlanganyela lomculi ovela eCanada, uMellisa Laveaux kuyinto enhle kakhulu lokho. Sijabulile kakhulu ukuba kube loNkwali le Sky blue lokhu kutshengisa ukuba uBulawayo ulabaculi. Thina njengeqembu leZimnyama sesilungiselele imbiza yethu isiphekwe yavuthwa sokusele ukuba siphakulule kuphela.
“Mhla welanga sizatshengisa umsebenzi wethu esawenzayo oka-2024 yiwo esizawubukisa uzulu,” kubika uPhibion.
Uqhubekele phambili eveza ukuba bacela uzulu azobasekela.
“Sicela uzulu abuye ngobunengi azozikholisela lathi emcimbini lo. Lingakhohlwa lapha ukuthi akulamali ebhadalwayo kungenwa mahala.
“Wozani lizozibonela liphakamise abaculi benu libuye ngobunengi,” kuphetha uPhibion.
