uMthunywa
Wayne Ncube
ILOKITSHI leMakokoba laziwa kakhulu ngokuhwatsha abadlali abalethalenta lenguqu, lakanye lokhu kubonakele kuviki edluleyo kudibene amaqembu ayisitshiyagalombili kumkhosi we-21st Youth Soccer Tournament.
Amaqembu akade eqoqwe ngaphansi kwenhlanganiso ye-Zanu-PF esigabeni sakuqala koBulawayo, abuthanise abathandi lababukeli abavela kundawo ezitshiyeneyo kulelidolobho ngenhloso yokukhipha intsha ezitaladeni.
Imidlalo le ibingeyokuqala ukuqhutshwa kulindawo njalo abaqoqi bayo babikele iphephandaba likazulu ukuba izaqhutshwa minyaka yonke.
Kumathimu aphatheke kulumkhosi bekule-City Centre, Ziyapapa, Mavhunga Rebels, Lookout Masuku, G T Sibanda, Ushewokunze, Tongogara leJM Nkomo.
Iqembu le-Ushewokunze yilo elibhuqe onke laphiwa umvuzo wemali yeMelika engange US$250. Abafana bethimu le abazange banike iqembu le-Mavhunga isikhathi sokumphefumula kumdlalo we-final ophele nge 2-1.
Ekhuluma lentatheli kaMthunywa unobhala wequla eliqhube imidlalo le uGift Muhomba uthe umqhudelwano lo uzakuba khona okwesikhathi eside uhlelwe yintsha.
“Ezemidlalo zikhulula, abantwabethu abasakhulayo emalokitshini afana leMakokoba. Le yindawo engaphansi kwe-Area 1 ngakho bekufanele ukuthi ithole okunje. Sikhangelele ukusebenzisa umdlalo wenguqu ukuba abantu bahlangane bajabule ngethalenta lenguqu. Inhloso emqoka yikuphakamisa abasakhulayo,” kulandisa Muhomba.
Kumqhudelwano walonyaka bekulezivakatshi eziphuma kuHulumende ezibalisa umphathintambo wezemvelo lokwethekelelwa kwelizwe uNqobizitha Mangaliso Ndlovu, umgcinisihlalo wequla le-District Co-ordinating Committee uRaymond Mutomba, uTshinga Dube, kanye lenkokheli yequla lentsha ku-Zanu-PF uMabutho Moyo.
