IPonel Academy ilola ithalenta

18 May, 2023 - 00:05 0 Views
IPonel Academy ilola ithalenta soccer

uMthunywa

Nkosilathi Sibanda

IKOLITSHI lomdlalo wenguqu esabelweni seMatabeleland North iPonel Youth Soccer Academy libika ukuba selikuzinga laphezulu lokulolonga abadlali ababukhali abazaphathisa amaqembu adinga abadlali abahlohlayo.

Lokhu kuza ngesikhathi abaqeqetshi abakumaligi amakhulu bekhala ngokuthi akulabagadli kuzwa kuleli, nanko phela kuyo yonke imidlalo kuhlohlwa amabhola amalutshwane.

IPonel Youth Soccer Academy ilenhlelo zokulolonga abadlali abasakhulayo, amankazana labafana, abaleminyaka elitshumi kusiya phezulu. Kuhlelo lolu, ibika ukuba isisuthiseka ekuthini inxuse amaqembu amakhulu ukuthi azocupha ithalenta kulo.

Umqondisi wePonel Youth Soccer Academy, uNelson Ndeka uthe amaqembu awakhululeke ukuzobukela abadlali.

“Ngenjabulo enkulu, sinxusa amaqembu ukuthi azobona esikwenzayo. Kuzaphuma abagadli abazathandwa ngabaqeqetshi,” kutsho uNdeka.

Ubike ukuba sebehlele ukuthi kusukela kulumnyaka baqale ukubhadalela abantwana abangaphansi kwekolitshi labo, abalitshumi lambili indleko zemfundo esikolo.

“Lokhu kungumbono wenkokheli zePonel Youth Soccer Academy. Sicabange ukuthi sinikeze usizo olukhulu kubadlali benguqu abathile abadabuka ezikolo lakuziqinti eziseHwange laseDete.

Sananzelela ukuba inengi labadlali abalethalenta esigabeni seHwange batshonela ukuhlala ezitaladeni lasemavinkilini. Ukuze senqabele ukutshabalala kwamaphupho abo, sikhethe ukuthi sibagcine ekolitshini lethu lenguqu lokuthi bachithe isikhathi besesikolo.”

UNdeka uthe inengi labazali abahlala endaweni ezitshiyeneyo ezibalisa iDete, iBinga, Hwange le-Folosi sebenikeze iPonel Youth Soccer Academy umlandu wokuthi ifundise abantwababo unobhutshuzwayo.

Uthe bahlele njalo lokuthi balungisise inkundla yabo.

“Kusehlelweni lwethu ukuba lenkundla engeyethu, izakhiwo zabadlali, ezomphakathi kanye lokwakha iHigh Performance Centre ezaqinisa ukufundiswa kwenguqu kwabasakhulayo,” kutsho uNdeka okholwa ukuba ithalenta lenguqu eZimbabwe ligcwele kodwa lincitshwa usekelo.

Kwelakusasa, kuminyaka emilutshwane nje, iPonel Youth Soccer Academy izakuba yindawo okuhlangana khona abaqeqetshi belwisa ukudinga abadlali. Umkhulu lumsebenzi njalo sizimisele.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds