Uncategorized

IPlumtree ithatha zonke izicoco zokutayila eGoli

06 Jun, 2024 - 00:06 0 Views
IPlumtree ithatha zonke izicoco zokutayila eGoli Miss loMr Glamour and fashion show 2024

uMthunywa

Ethel Ncube

BEKUYIBUKHAZIKHAZI eJoburg, eMzansi lapho obekutayilwa khona ngempelaviki edlulileyo, kwanqoba ababili abavela ePlumtree abayibo abathethe izicoco zikaMiss loMr Mapressa Glamour and Fashion 2024.

Othole isicoco sikaMiss Mapressa Glamour and Fashion  2024 nguYvonne Nyoni odabuka eMangarame ePlumtree kuthi isicoco sikaMr Mapressa Glamour and Fashion 2024 sihambe kuXolani Sibanda odabuka eMkhologwe eMambale ePlumtree.

UMr Mapressa Glamour and Fashion 2024 uthole ivoucher yemali engange R7 500  njalo uzakuyafundela ikhosi yeBeauty Therapy mahala kuthi uMiss Mapressa Glamour and Fashion 2024 uzathola ithuba lokuyafundela ukutshayela imota, ukuyafunda ikhosi yebeauty therapy, uzakhetha impahla zendlini mahala, iNgamo Safaris izamnika indawo yokulala ehoteleni, iLavida Guest House izamnika ithuba lokulala  okwelanga elilodwa kanye lehamper yama-toiletries.

Intatheli ixhumane loMr Mapressa Glamour and Fashion Show uXolani Sibanda obike ukuba ubeqala nje ukwenza ezokutayila.

“Mina ngileminyaka engu-35 yokuzalwa ngidabuka ePlumtree, yazi ngijabule, angizazi ukuthi ngithini ngokuthola kwami isicoco emcimbini lo. Mina ngalungiselela okwamalanga amabili kuphela, ngahamba ku fashion designer wami wafika wangitshengisa ama-designs akhona ngakhetha engikufunayo, wangithungela engangikufuna.

“Ngaya emcimbini lami njengomuntu oqalayo angizange ngizihluphe kangako ngoba ngangingazi ukuthi lami bazangikhetha ngithole isicoco. Ngajabula kakhulu sengikhethiwe ukuba nguMr Mapressa Glamour and Fashion  2024.

“Kwangijabulisa kakhulu njengoba ngangiqalisa ukungena emcimbini onjengalo. Ukuthi unqobe yikuthi ukhethe impahla zakho ezitshiyeneyo kulezabanye.,” kubika uXolani.

UMthunywa ubuye wathintana loYvonne Nyoni onguye okhethwe ukuba nguMiss Mapressa Glamour and Fashion  2024.

“Ukutayila ngaqala ngileminyaka engu-13 esikolo seLockview Primary koBulawayo, kuthe sengikhulile ngayajoyina ukuyatayila ukuba ngu Miss BuKalanga lapho engathola khona isicoco sokuba nguMiss BuKalanga.

“Ngingathi le yinto engithanda ukuyenza njalo kukhanya ngilesipho sakhona. 

“Khathesi ngihambe ngisiyatayila kuMapressa Glamour and Fashion Show lapho engifike ngancinta abanye ngaba nguMiss Mapressa Glamour and Fashion. Ngijabule kakhulu ukuthola isicoco lesi. Ngithi kwabangatholanga lutho, lingadinwa kodwa bekezelani liqine kuyoze kulunge ngelinye ilanga,” kuphetha uYvonne

 

 

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds