uMthunywa
Thokozile Mbedzi
KULEPHOLISA lesiqintini seZezani, eBeitbridge elithumbe umntaka-makhelwane lamgcina okwamaviki amathathu okubangele ukuthi lithi selibuzwa nguyise womntwana ngesenzo salo lamdinda andubana limgqibe inhlabathi emlonyeni lemakhaleni.
Ipholisa leli, okuzwakale ukuthi nguZuruki kubikwa lathi liqeda ukutshaya umakhelwane walo, uMnumzana uTsenesayi Ndlovu owayeseqalekile, laya emzini walo lafika lanika umkalo isithupha salo lathi ayebika emapholiseni ukuthi usebulele umuntu.
Isiga lesi senzakale ngeviki ephelileyo lapho uZuruki atholakala elomntakaMnu Ndlovu oleminyaka engaphansi kwengu-16.
Omunye umakhelwane olandisele uMthunywa ngesehlakalo lesi uMnumzana Tsumbedzo Dube uthe okwenza ipholisa leli latshaya umakhelwane walo yikuthi kungani ethukuthele ukuthi umntanakhe bamgcine okwamaviki amathathu engayi esikolo bengamtshelanga.
“UZuruki wazondela ukuthi kungani umakhelwane wakhe ebekwazi ukuthi ugcine umntanakhe emzini wakhe okwamaviki amathathu engamtshelanga.
“Okwenza uMnu Ndlovu wabakwazi ukuthi uZuruki ugcine umntanakhe yikuthi wabona abanye abazali bevela bona abantwana esikolo yena engazi lutho okwenza waya esikolo bamtshela ukuthi umntanakhe uselamaviki amathathu engekho esikolo.
“Wathi esebuyela ngekhaya wahamba edinga umntanakhe omakhelwane basebemtshela ukuthi ukoZuruki, umakhelwane wakhe lapho athi engena khona wahle wambona umntanakhe,” kutsho uMnu Dube.
Kubikwa uMnu Ndlovu esebone umntanakhe wahamba wayabika enduneni indaba le.
Uqhubekele phambili uMnu Dube wathi ngelanga ledale, uZuruki wathola uMnu Ndlovu esilindweni samabhasi elindele ukugada aye edale wahle wadobha ilitshe wamtshaya ekhanda okwabangela ukuthi aqaleke.
“UZuruki ebona uMnu Ndlovu eseqalekile waqala ukumgqiba inhlabathi emlonyeni lemakhaleni wamtshiya kodwa wancedwa ngabafana ababeseduzane.
“Abafana laba bahle bacela uncedo ezimoteni ezazisedlula bamusa esibhedlela,” kulandisa uMnu Dube.
Kubikwa uZuruki uthe efika emzini wakhe wahle wathuma unkosikazi wakhe ukuba ayebika emapholiseni ukuba usebulele umuntu.
UMlisa uLiberty Mleya ebuzwa ngodaba lolu uvumile wathi lwamangalwa edale lakhe ngakho ababili laba balimazana mzwana kumele bezothoniswa edale.
“Udaba lwamadoda amabili uTshenayi loZuruki lwamangalwa edale lami kodwa ababili laba basebesilwa balimazana bengakafiki edale,” kutsho uMlisa uMleya.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe usadingisisa ngalo.
“Udaba lolu ngisaphenyisisa ngalo enkambeni lapho olumangalwe khona,” kuphetha uInsp Ndebele.
