uMthunywa
Thokozile Mbedzi
KULOWESIFAZANE wesigabeni sePanganai eChipinge olwela impilo yakhe esibhedlela seBirchenough Bridge ngemva kokudutshulwa amahlandla amahlanu lisoka lakhe, elilipholisa kubangwa ukungathembeki.
Isehlakalo lesi senzakale mhlaka 27 Mpalakazi ekuseni.
UFreeman Sithole oleminyaka yokuzalwa engu-38 kubikwa udubule intombi yakhe uShingayi Magazi oleminyaka engu-30 yokuzalwa kane izandla zombili lesifubeni andubana acele ezinyaweni.
USithole wabiza intombi yakhe ekuseni ithe ifika kuye waqala ukuyibuza ngensolo ayelazo zokungathembeki.
Kubikwa uMagazi wazama ukuchazela isithandwa sakhe kodwa uthe enanzelela ukuba kasizwisisi wazama ukubaleka indoda yakhipha umbhobho esikhwameni yaqala ukumdubula.
Ekhuluma lentatheli kaMthunywa uNkosazana Emelda Mafu uthe babone into yamehlo.
“Siphithene amakhanda silapha ngokwenzakeleyo. UFreeman ubelokungazwisisani lentombi yakhe uShingai yena abemsola ngokuba kathembakalanga kwahle kwaba lokungazwisisani phakathi kwabo bobabili.
“UShingai uthe ebona ukuthi usemzondele njalo uphethe isikhali wazama ukubaleka yikho ukumdubula kwakhe kane ezandleni zonke zombili kanye lesifubeni.
“Okube buhlungu yikuthi eqeda lapho, uFreeman uhle wabaleka kaziwa lapho akhona. UShingai yena ulalisiwe esibhedlela seBirchenough Bridge,” kulandisa uNkszn Mafu.
Isikhulumi samapholisa elizweni uAssistant Commissioner Paul Nyathi uthe: “Amapholisa aphenya icala lokudutshulwa kowesifazane ngowesilisa abethandana laye.”
“Owesifazana lo udutshulwe kane ezandleni kanye lesifubeni.
Umetheswacala olipholisa ulokhu engakabotshwa,” kuphetha uAsst Comm Nyathi.
