Iphenduka isilo iBosso

31 Oct, 2019 - 00:10 0 Views
Iphenduka isilo iBosso Abalandeli beBosso kumdlalo wabo le FC Platinum eBarbourfield Stadium ngeSonto

uMthunywa

Bongani Ndlovu 

KUZWAKALA ukujabula emulini yeqembu leHighlanders esibone ukukhanya ngokuza komqeqetshi omutsha uHendrik de Jongh. Akula loyedwa okhonona ngalumqeqetshi osephenduke waba liqhawe kumidlalo emithathu.

Ukuza kwalumqeqetshi osebizwa ngelithi “Hlabangana” ngabalandeli kudale inguquko. Uyakutsho laye umqeqetshi ukuba ulethe inguquko kundlela alolonga ngayo lokudlala kwabadlali. Labadlali kubikwa sebehlonipha.

Ekhuluma lentatheli kaMthunywa omunye wabalandeli beqembu leBosso uNdabezinhle Hlongwane ubike ukuba usekwazi ukuba imali yakhe iyangaphi.

“Selokhe kwabuya uHlabangana eqenjini lathi njengabalandeli sesikwazi esikulanda enkundleni yebhola ngoba iqembu lidlala ibhola elihlabusayo njalo elimnandi.

“Lamuhla sihlabelela phezulu ngemva kokutshaya intshatshu zeligi iFC Platinum okutshengisa ukuthi ukubuya kukaHlabangana kuze lenguquko enkulu eqenjini,” kuchaza uMnu Hlongwane.

Uqhubekele phambili waveza ukuba ukudlala kweBosso kumkhumbuza amalanga abo odumo lapho ababetshaya amaqembu waya waya.

“Ngendlela iBosso le edlala ngakhona amalanga lawa ingikhumbuza isikhathi saboNgodzo loChoruma lapho esasikwazi ukuba iBosso ayilaqembu elethukayo nxa kusiza ebholeni.

“Imisebenzi yabadlali iyabonakala lezinsuku nanko isiphenduke isilo iBosso, lokho ngikutsho ngoba sacina kudala ukudlala imidlalo eyisitshiyagalombili singadliwa,” kuveza uHlongwane. 

Intatheli ibuye yaxoxisana lo Johannes “Signature” Ngodzo umunye owake wadla ubhedu kuBosso othe ulokuthokoza ngokudlala kweqembu.

“Iloba kuqala isizini besidlala kuhle kodwa udubo besingatholi imiklomelo eyiyo, siyajabula ngoba khathesi sesidlala sinqoba.

“Khathesi nxa ulibukele iqembu uyakubona ukuba abadlali basebenza nzima, njalo kuyakhanya ukuba lokhe besalakho ukufuna ukudlalela iqembu,” kuveza uSignature.

Uqhubeke waveza ukuba okumthokozisayo yikuthi izembe seliphumile ekhaya.

“Osekusithokozisa njengabalandeli yikuthi asisadlaleli ukulwela ukuhlala kuligi kodwa lathi sesikhangelele ukuqeda isizini sisendaweni engcono,” kuchaza uNgodzo. 

Ngemva kokudlala imidlalo yabo eyitshiyagalombili bedlala ibhola elimangalisayo kakhulu iBosso isimelele umdlalo walamuhla lapho abazahlangana khona labafana bakaphurofethi iYadah FC kumdlalo weligi.

Khathesi iBosso ihleli kunombolo yesi 9 okutsho ukuthi inganqoba umdlalo wayo walamuhla amanye amaqembu edliwe iyabe ilanda impelaviki ikunombolo 5 laphuzo angu-39 emdlaweni engu-28.

Imidlalo ngoLwesine:

Highlanders v Yadah (Barbourfields), Black Rhinos v TelOne (National Sports Stadium), Triangle v Hwange (yedluliselwe phambili).

Share This:

Sponsored Links