YiNtatheli kaMthunywa
BAZAKHOLISA abathandi bebhola lenyawo eNkayi kulimpelaviki kumkhosi wokudinga abadlali abalesiphiwo oqoqwe yiOrganisation for Rural Assocications for Progress (Orap).
Imidlalo le kubikwa izabiza inengi labadlali lamaqembu atholakala kulindawo ehlala isalele emuva kwezokuphakanyiswa kwezemidlalo.
Inhlanganiso yeOrap ibikele iphephandaba likazulu ukuba ikhethe ukuthi ifake umncintiswano wayo enzikini yeNkayi ngoba ikubone kufanele ukuba inikeze ithuba kwabasakhulayo bakulindawo.
Kubikwa ngemva kwemidlalo kuzakhethwa abadlali abenze kuhle abalakho ukuthola isikhathi sokuyadlala kumaqembu abalisa iHighlanders.
UBryton Malandule oyisikhulu sokuphathwa kwemali kulinhlanganiso uthe phezulu kwakho konke, inhloso yabo eNkayi yikukhuthaza intsha ukuthi itshiyane lokuhlalela izandla, iphatheke kwezemidlalo.
“Isiqokoqela sethu ngesokukhuthaza abasakhulayo ukuze babone ukuba ezemidlalo ziyinsika empilweni zabo.”
“ Imidlalo yethu le iyancedisa umphakathi ukuthi abone amaqhinga wokubalekela udubo ngoba inguqu kulezi insuku iyamphakamisa umuntu aphile impilo engcono.
“Singakhangelisisa, abasakhulayo sekungathi abakhwabithi ukuphatheka kwezemidlalo ngokuqinileyo. IOrap itshisekela ukuguqula ingqondo zabantwana beNkayi bakhaliphe,” kutsho uMalandule.
UMalandule uphinda njalo abelilunga lebhodi yabakhokheli beZimbabwe Football Association (Zifa).
Uthe umkhosi wemidlalo uzavulwa nguSithembiso Nyoni umphathintambo kahulumende obona ngezabomama lamabhizimusi asacathula.
“Sizagxila ngezemidlalo mhla welanga kodwa asikhohlwa ukumemethekisa umbiko wokuthi abantu bakithi kumele baphakamele phezulu bazisebenzele. Thina kunhlanganiso yeOrap sithi ‘Zenzele’ ngakho akubenjalo laseNkayi. Isintu sithi akusimuntu ongasimuntu walutho” kutsho lesi isiphathamandla.