uMthunywa
Liberty Dube
ABAHLALI beChiutani, eChimanimani ngeviki ephelileyo basele bengelankani ngemva kokuba esinye isalukazi siveze ukuthi sibamba ngenkani umzukulu waso ukuthi amunyise inyoka yaso.
Indaba le ivele ngoMgqibelo odluleyo kunkundla yenduna uSaurombe lapho ugogo uDalice Dzemura abizwa khona kuzothethwa icala aletheswa ngumzukulu wakhe obizwa ngokuthi uPortia Dzemura.
UPortia useleminyaka yokuzalwa engu-20.
Ugogo uDzemura uyavuma ukuthi wenza imithanithani yobuthakathi njalo ubamba umzukulu wakhe ngamandla ukuthi amunyise inyoka yakhe kodwa uyala ukukhuluma ukuthi kungani esenza lokhu.
Induna uSaurombe
Induna uSaurombe ithole ugogo lo elecala lobuthakathi yasimhlawulisa imbuzi ezintathu.
Kubizwe inyanga ezintathu ukuthi zizohlambulula ugogo lo, lomzukulu wakhe.
Ngesikhathi esenkundleni, uPortia wakhala kakhulu echasisa ngendubo ezitshiyeneyo ahlangana lazo empilweni.
Umama ozala uPortia wakhuluma ngobandlululo umntanakhe asedibane lalo ngenxa yodaba lolu.
“Yinto eyesabekayo kakhulu ukuzwa ngendaba zobuthakathi ezifana lale, siyethemba umntwana uzakhululwa kumthwalo lo. Lamadoda amanengi ayamenyanya ngenxa yendaba le,” kutsho umama kaPortia.
Induna uSaurombe ithe indaba efana lale iyesabisa njalo ayikaze izwakale esigabeni sayo.
“UPortia weza edale ekhuluma ngokubanjwa ngamandla ukumunyisa inyoka kagogo wakhe,” utsho njalo.
“UGogo uDzemura uyavuma ukuthi uyathakatha lokubangela ukuthi abantu babelomnyama esigabeni kanye lokumunyisa inyoka yakhe kumzukulu wakhe uPortia. UPortia ngumuntu wesifazane osehlangane lobandlululo olukhulu esigabeni ngenxa yalokhu akwenziwa ngugogo wakhe,” kuphetha induna uSaurombe.
