‘Inxwala, ngumkhosi okumele ukhunjulwe’

13 Jun, 2024 - 00:06 0 Views

uMthunywa

Langalakhe Mabena

UKUQAKATHEKA kokukhumbula imikhosi lemkhuba ethile eyasenziwa ezweni lamaNdebele kugcizelelwe emcimbini walonyaka oweBulawayo Arts Festival (BAF), lapho ikhansili yakoBulawayo eqhube khona ingxoxo ebigxile kusikhumbuzo somkhosi weNxwala, owawukhona emandulo.

Ingxoxo yesikhumbuzo seNxwala senziwe ngeviki eMcDonald Hall elokitshini leMzilikazi. Obephethe intambo kungxoxo le bekungu ngumculi weJazz uGog’Bekezela, obesaziwa ngokuthi nguBothwell “Bekezela” Nkomo, kwezomculo kuminyaka edluleyo.

Osaziwayo kwezamasiko lomculo abakade bakhona bagoqela iNduna uMbusi Dakamela weNkayi, eMatabeleland North, abaculi uHwabaraty, Bhila, Madlela Skhobokhobo, iqembu lembube eleGreat Stars Ijongosi, Dr Gasolo, Ashely Siwela kanye loNtando Ndlovu.

Bekuculwa kulumkhosi, kugidwa ezesiNtu kuhaywa lenkondlo. Induna uDakamela obengomunye wezikhulumi uveze ukuthi kubalulekile ukuthi abantu bahlale bebuyele muva, bafundisane ngamamasiko abo lendlela yokuphila ukuze baphinde baxhumane labokhokho babo, balandele indlela yabo yokuphila.

“Ngesikhathi abelungu besithola lapha e-Africa, sasilendlela yethu yokuphila, bayiphambanisa njengoba bafika lendlela zabo zokuphila abazigxilisa kithi njengobuKhristu.

“Satshelwa ukuthi isiko lethu libi futhi lisemuva kodwa sikhonza uNkulunkulu oyedwa. Phakathi kwezinto esizenzileyo, senze umcimbi weNxwala, sigubha khona isivuno sokuqala. Inxwala leminye imikhosi yesiNtu kwavalwa ngesikhathi abelungu bengena endaweni yethu. Njengenkokheli yomdabu, ngiyathaba ukuthi iBAF yenze ingxoxo le yokuvuselela amasiko ethu lokwabelana ulwazi,” kutsho induna uDakamela.

Inxwala bekungumkhosi oqhutshwa minyaka yonke ngemva kokuvuthwa kwezilimo, ngokuvamileyo wawuqhutshwa ngoZibandlela. Kwakungumkhosi wenkolo, wokujabulisa imimoya yabantu lokuvuselela ubuqotho besizwe lokubonga iNkosi. Umcimbi lo wawumayelana njalo lokuhlanza lokuvuselela.

INkosi yiyo kuphela eyayikhokhela lumcimbi.

 

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds