uMthunywa
YiNtatheli kaMthunywa
INTSHANTSHU zokugijima izwe lonke ziwukhangele ngamehlo abomvu umncintiswano weCoca-Cola Four Minute Mile, ozavula inkundla zemidlalo kumbukiso we-Zimbabwe International Trade Fair koBulawayo kulimpelaviki.
Umjaho lo uza ngesikhathi idolobho lakoBulawayo selenze imincintiswano yokugijima eyedlula emine kunyanga ezintathu, okuveza ukuba lumdlalo usuthole usekelo obelukade luswelakala kulumhlubulo welizwe.
ICoca-Cola Four Minute Mile inxusa labo abalesiqubu sokuqeda ikhilomitha lengxenye ngesikhathi esingaphansi kwemizuzu emine.
Inhlanganiso yeBulawayo Athletics Board yethule umbiko wokubonga inkampani yeCoca-Cola ngokugcina lumncintiswano koBulawayo.
Umgcinisihlalo weBab uManuel Mpofu utshele iphephandaba likazulu ukuba amalungiselelo omjaho asesezingeni eliphezulu.
“Nxa idolobho lakoBulawayo lithola imijaho enjengale, kuyisibonelo sokuthi kulethemba kwelakusasa kumdlalo wokugijima. Sethula isibongo esikhulu kubasekeli bethu inkampani yeCoca-Coca ngokuqhubeka iqoqa umjaho weCoca-Cola Four Minute Mile. Lokho akubeyinkuthazo lakubagijimi bethu ukuthi bazilungiselele ngoba usekelo lukhona.”
Umgcinisihlalo lo uthe kumaviki amabili adluleyo benze uhlelo lokukhetha abagijimi abazancintisana ngoMgqibelo.
Uthe ihlandla lokucina lokudinga intshantshu zesiqubu lenziwe ngeSonto edluleyo. Kubikwa ngoLwesihlanu kuzaqhutshwa umbuthano wokwehlisa inani labantu abazagijima.
“Bebebanengi abantu abebefuna ukuphatheka kodwa behlulwa yisikhathi sokuqeda umango. Ungaze ukhwabithe kanganani ukugijima, okuqakathekileyo yikuphutsha ngesikhathi esifaneleyo.
“Kunani labagijimi esibakhethileyo, kuzaphinda kukhethwe njalo abanye ngoLwesihlanu anduba kuvulwe inkundla ngoMgqibelo ekuseni. Sesilungiselele saphelela ukuthi siqhube umjaho lo,” kubika uMpofu.
Uqhubeke wathi bafuna ukukhetha abantu abangamatshumi amabili kuphela.
“Sizakwenza ama-semi-final la ukuze sikhethe labo abazatshaya intambo ngesikhathi esifitshane. Abazaphumelela ukuqeda umango kuqala abalitshumi yibo abazaphiwa imvuzo.”
Kulumncintiswano kugijima amadoda kuphela njalo ngomnyaka odluleyo owatshaya intambo kuqala kwakunguElijah Mabhunu ogijimela iqembu lamapholisa eFairbridge.
Kuminyaka edluleyo kulabagijimi abakhe amabizo kumjaho weCoca-Cola Four Minute Mile ababalisa uPhathisa Ngwabi (Hwange Colliery Athletics), uTitus Nyathi (LM Academy), uThando Maphosa (Sparrows), uTrust Chidomaya (ZRP), uDumo Mkhwananzi (Sparrows) labanye abavela kumaqembu azimisele ukuthuthukisa umdlalo wokugijima kuleli.
