uMthunywa
Nkosilathi Sibanda
KUDALA kwakunganje ezikolo!
SESADLULA isikhathi lapho okwakuthiwa imidlalo ebalisa i-rugby, ikhilikithi, ithenisi le-hockey ngezidlalwa ngabantwana abakuzikolo zaphezulu emasabhabha.
Bekuyi velakanci ukuthi abafundi bezikolo ezisemalokitshini kumbe emaphandleni baphiwe ithuba lokudlala imidlalo le. Ezinye izikolo bezingela nkundla lempahla eneleyo ukuthi zincintise lezinye, kodwa konke lokhu sekwedlule nanko labantwana abafunda esiqintini sePlumtree sebezadlala i-rugby bathole amathuba njengabanye.
Ngenxa yokusondela kwempucuko esigabeni sePlumtree, isikolo sePhakamani High School leDingumuzi Primary zizahamba phambili kumdlalo we-rugby nanko sezithole usekelo lwempahla lamabhola oluvela kuFiona Dumani.
UDumani owayengumfundi ezikolo zePlumtree lezi njalo unikeze lezi izipho njengesibongo kulandela ukuthola imfundo losekelo, okwamnikeza amathuba okuphumelela empilweni. Okwakhathesi uDumani usebenza kwezempilakahle ese-United Kingdom.
Sports and Recreation Commission
Ngesikhathi esafunda kwakungela midlalo enjengale.
Kulandela ukuzwa ngesimo sezemidlalo esikolo seDingumuzi Primary, uDumani ukubone kufanele ukuthi elule isandla, abengomunye walabo abaletha ingqubekela phambili esikolo esidala kulazo zonke emalokitshini asePlumtree.
Ekhuluma lentatheli kaMthunywa ngoLwesibili ekuseni ese-Ngilandi, uDumani uthe ngenxa yokunanzelela ukuba muva kwabafundi kwezemidlalo, kube ngumlandu wakhe ukuthi aphathise iDingumuzi Primary leBabambeni ukuze lazo ziqale ukuncintisa kumdlalo lo.
Uthe ngenxa yokwanda kwamathuba avela kumidlalo efana lalo, ulethemba lokuthi ngesikhathi amaqembu ezikolo lezi eselolonge aphelela, abadlali bazaqala ukubona inguquko empilweni zabo.
“Izikolo zibaluleke kakhulu empilweni zethu. Ziyinsika yokubunjwa kwengqondo zabantwana ukuze bakhule bengabantu abalobuntu, abazenelisa ukuthi bancedise umphakathi ngamathalenta abo,” kutsho uDumani.
Ibhola le rugby
“Ngathola imfundo ezikolo zombili, eDingumuzi laseBabambeni. Ngihlale phansi ngajulisisa ingqondo, ngathola icebo lokuthi nginikeze isibongo ngesipho sempahla zemidlalo.
“Ukudlala kuhle kwezemidlalo kutsho ukuba umfundi ulethalenta, ngakho kumele lisekelwe ithalenta lelo ngendlela ezitshiyeneyo ezibalisela ukuncedisa ngamabhola, impahla lokunye.”
Abazali besikolo seDingumuzi babike ukuba bazaphathisa ngokukhuthaza abantwababo ukuthi bengavilaphi kwezemidlalo.
“Siyabonga okwenziweyo nguDumani. Okwethu okumele sikwenze yikucebisa abantwabethu ukuthi basebenzise leli ithuba ukuthi bazitshengise ithalenta labo. Akuvamanga ukuthi uthole umuntu olenhliziyo enhle njengoFiona, owenelisa ukuthi asebenzise imali yakhe ukuthengela izikolo impahla enengi njalo ebaluleke njengale,” kutsho uPhilani Moyo, oyisakhamuzi elokitshini leDingumuzi.
Uthe nxa kungahlala kunje, abafundi besekelwa kwezemidlalo, kungenzeka ukuthi ngelinye ilanga esigabeni sePlumtree kuphume ingcitshi zabadlali ezingadlalela amaqembu elizwe.
Kusenjalo, uDumani wengeze umusa wakhe ngokunikeza lesikolo seBabambeni Primary esisePumula koBulawayo.
Isenzo sikaDumani size ngesikhathi inhlanganiso zabaphathi bezikolo zivale ukuncintisana kwezemidlalo kusesatshelwa ukuqhamuka kweCovid-19.
Loba abafundi bethabile ngokuphiwa impahla entsha, balusizi ekuthini kuzadonsa isikhathi eside kuze kuvulwe imidlalo ezikolo. Kulindwe isimemezelo esivela kunhlanganiso zeNational Association of Secondary Heads (Nash) leye- National Association of Primary Heads (Nash), esizacacica ngekusasa yezemidlalo ezikolo.
