IQEMBU labafundi bekolitshi abafundela ukuthunga impahla zokugqoka, iPhony Boys selithethe idolobho lakoBulawayo ngodumo ngokuthengisa amakepesi abizwa ngokuthi ngama six panel caps.
Iqembu leli likhethe ukuhamba ngendlela engahanjwa ngabanegi nxa umuntu efuna ukuziphilisa. Kuliviki intatheli kaMthunywa ithe ukuxhumana lamajaha ukuzwisisa ngcono ngezomceco.
Balandise ukuba baqala lokhu kuyinto ababezenzela yona njenge qembu bengahlosanga ukuthi bangathengisela umphakathi wakoBulawayo.
“Siqala lokhu sasingazimiselanga ukuthi sithengisele abanye abantu kwakuyinto yethu njengabangane. Kodwa ngenxa yobulembu abantu babona umsebenzi wethu bawuthanda bafisa ukuthenga, ngakho saqala ukuthi sizilungise ngobunengi sithengisele umphakathi,” kutsho uTafadzwa Nobela umsunguli waleliqembu.
Bachaze ukuba bananzelela ukuba intsha yakoBulawayo iyaphuza ukubamba ngezomceco ngakho bakwenze kwaba ngumlandu wabo ukuba kube yibo abakhokhelayo ngokuletha i-fashion yalezi nsuku. Ubuye walandisa ukuba balutshwana abantu abalama-labels koBulawayo.
“Intsha enengi yakoBulawayo iyaphuza ukulandela kwezokuceca, uthola umuntu elokhe egqoka impahla eseyedlula kufeshini. Saqala ngama Phony caps khathesi besesifuna ukuletha ezinye impahla kodwa abantu khona befuna ama-caps. Umuntu owangenza ngathanda futhi ngaqhubeka ngilungisa ezokugqoka ngu-Ian Conner onguye ogqokisa umculi omkhulu uWiz Kalifa,” kutsho Tafadzwa Nobela.
Uphethe ngokuthi impahla bazithenga kuleli ngoba belesifiso sokuphakamisa amabhizimusi akuleli.