Intsha ibizwa kumjaho we-Econet

28 Jun, 2018 - 00:06 0 Views
Intsha ibizwa kumjaho we-Econet

uMthunywa

YiNtatheli kaMthunywa
INHLANGANISO yeNational Athletics Association of Zimbabwe (Naaz) ibika ukuba iyakhathazeka ngokusilela kwabatsha abakhwabitha ukugijima imango emide.

UMkhokheli weNaaz uTendai Tagara uthe baphezulu komkhankaso wokubiza abasakhulayo kuyo yonke imncintiswano.

Uthe kumele labantwana besikolo abalethalenta bavukele phezulu nxa kunxuswa abagijimayo. UTagara ukhulume lokhu egcizelela ububanzi bemncintiswano yeTanganda Half Marathon loweEconet Victoria Falls Marathon.

Umjaho weTanganda uqhutshwe ngeSonto edluleyo kuthi oweFolosi ukhona kulimpelaviki. Imjaho yomibili ibalelwa phakathi kwaleyo engaphansi kweAssociation of International Marathon and Distant Races — inhlanganiso eqhuba imincintiswano yokugijima umhlaba wonke.

“Bangaphi abantwana abasakhulayo kumijaho efana leEconet Victoria Falls Marathon? Sithi kubo ababuye bezovusa isiphiwo sabo. Umdlalo wokugijima usubhadala. Bakhona abantu asebenze impilo zabo zaguquka ngokugijima. Inhlanganiso yeNaaz izahlala isenza konke okusemandleni ayo ukuthi ibumbe abagijimi abazamela isizwe kwelakusasa,” kutsho uTagara.

Kusenjalo, kumjaho weEconet Marathon abaqoqi bawo babika ukuba sebeqalisile ukwamukela labo abalesifiso sokugijima umango ongamakhilomitha alitshumi lane edolobheni leFolosi ngoNtulikazi.

Kumbiko othunyelwe iphephandaba likazulu ngoLwesibili, kubikwa njengeminyaka yonke, abagijimi bazasukela eLala Lodge besiyaqeda umjaho esikolo seVictoria Falls Primary.

“Umjaho walonyaka uzaqhutshwa mhlaka 3 Ntulikazi. Umango omkhulu owe42,2 km, lowe-21,2 kanye le7,5km zilandela ndlela nye. Kuzagijinywa kusukela egedini leLala Lodge, kudlulwe ebholohweni leFolosi njalo.

“Abagijimi bazathi ukusondelela kumgcele weZimbabwe leZambia bazibonele mathupha ubuhle bemvelo kulindawo andubana bayecina ukugijima esikolo seVictoria Falls Primary.”

Omunye wabagijimi bodumo kuleli uNkosiyazi Sibanda ubike ukuba uselungiselele ukuthi ayezama ukuphutsha umjaho lo ephambili.

USibanda nguye oseke waba yintshantshu yalumjaho ngokuqeda ukugijima umango wamakhilomitha angu-42 ngemva kwamahola amabili nje (2.19. 11 sec). Lonyaka ubhekane lokwenza okufanayo.

“Ngilungiselele ngaphelela. Imijaho enjengale iqakathekile kithi abagijimi. Ngilethemba lokuthi ngizaqhuba kuhle, ngenelise ukuthi nginqobe abanye,” nguSibanda lo.

“Lonyaka kuzabe kulomunye umncintiswano njalo owe-Econet Half Marathon Corporate Challenge. Lapha-ke kuzancintisa abamankampani ehlukileyo ngenhloso yokuthuthukisa ubudlelwano. Abazanqoba-ke emncintiswaneni lo bazazitholela inkezo,” kutsho uFambarega.

Umncintiswano weEconet Victoria Falls Marathon wandise ukuba lebizabiza sibili ngoba abagijimi abangedlula 600 babaphatheke emncintiswaneni lo.

Amazwe ehlukeneyo abalisela iZimbabwe, Canada, Spain, Sweden, USA, New Zealand, Japan kanye leEthopia kawaswelakali emncintiswaneni lo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds