Ethel Ncube
IQEMBU le-rhumba eleNsimbi zeZhwane lihwatshe idlalade elitsha selokhu kwedlula umnikazi weqembu uMa-Eli ngeviki ephelileyo.
Idlalade leli lethulelwe eNewline Newtown, eMzansi Afrika. Ngesikhathi besethula idlalade labo bebesekelwa nguZinjaziyamluma, Dubia Masters, Gobisana labanye abahlabeleli kukanti lomunye umhlabeleli weMzansi Africa uPuntsununu ubekhona emcimbini lo.
Intatheli ixhumane lomaneja weNsimbi zeZhwane uBahlanu Sibanda obike ukuba idlalade selikhona.
“Idlalade sesilethule ebantwini, silethulele lapha eMzansi Afrika, ingoma sezikhona emoyeni ikanti lamaUSB alengoma zethu asekhona. Idlalade leli lilengoma eziyisikhombisa ezithi Imbeleko, Ingqinama, Imbobo zamajuba, Umfukula, Morning glory, Umathambula lethi I-mileage.
“Idlalade leli lizaphinda lethulwe koBulawayo ePalace Hotel ngoLwesihlanu lapho esizabe sitshaya khona. Sizabe silama-USB esiwathengisayo njalo,” kubika uBahlanu.
Uqhubekele phambili ebonga uzulu obuye emcimbini weNsimbi zeZhwane eMzansi Afrika.
“Ngiswele imilomo ezinkulungwane yokubonga abantu ababuye emcimbini wethu eMzansi Afrika.
Abantu bebegcwele njengetshebetshebe likaGwayi. Ngiyabonga bantu bakithi ngokusipha usekelo lwenu.
Ngiphinde ngibonge indlela eliziphathe ngayo emcimbini, liziphathe kuhle kwaze kwasa kungelankinga ebekhona. Ngingakhohlwa ukubonga omunye wethu ongumhlabeleli eMzansi aphinde abengumlandeli weBosso uSamukele Majola ovela kwaZulu Natal eColenso owazakala ngokuthi Putsununu. Siyabonga mfowethu ngokuba lathi kuze kuse, siyabonga usekelo lwakho.
“AbaseZimbabwe asihlanganeni koBulawayo ePalace ngoLwesihlanu siyabe sikhona sisethula idlalade lethu,” kuphetha uBahlanu.
