Wayne Ncube
YILOBA ibizo lakhe likhuluma ngokutshaya amathambo umhlabaleleli owaziwa ngelokuthi Mr Bones osethethe udumo kuleli kanye leSouth Africa kawatshayi amathambo kodwa upheka umculo otshisayo osuhlanyisa abantu kuleli kanye laseMzansi.
Umhlabeleli lo ulodumo ikakhulu endaweni zePlumtree eGaramtata njalo useledlalade elitsha elitshisayo.
NgoNcwabakazi umhlabeleleli lo uMxolisi ‘‘Mr Bones’’ Ndlovu ukhiphe idlalade elithi Inkunzimalanga Zendawo ephethe ingoma esidume kakhulu emsakazweni ethi Phuma langa sikothe.
Lelidlalade liphethe ingoma eziyisitshiya galombili zonke kungeze rhumba.
Ekuphumeni kwedlalade leli ngoNcwabakazi, uMr Bones kanye leqembu lakhe ahlabelisana lalo bathola izandla ezinengi ngoba abantu bethanda izingoma ezikuleli dlalade.
Ekhuluma lentatheli yephephanda likazulu onguye okhulumela umculo kaMr Bones koBulawayo, uMpathiseni ‘‘Stress’’ Ndlovu uthe ingoma eziphethwe kuleli dlalade ziqophe ukujabulisa uzulu.
“Kungoma ethi Inkunzimalanga Zendawo yikho lapho okuhlatshelwa khona ngomalayitsha ukuthi labo kumele bahlonitshwe ngomsebenzi omkhulu abewenzayo,” kutsho uStress.
“Phakathi kwawo wonke amadlalade esawakhiphayo abantu batshengisele ukuthanda leli kakhulu ngakho lathi sithe siphindisele kubalandeli bethu ngokuthi kuwonalo umnyaka sizabenzela imicimbi engathi ithe xaxa sifinyelele kuzo zonke izindawo.
“Kungoma ezikudlalade leli ngithanda ukuthi uzulu aqaphele eyesibili, ethi Bengangigqibela ngiphila. Lingoma umhlabeleli wayiqondisa kumama omzalayo ethi kabalandele indlela yakhe abanye omama bekhangelane lemizi yabo hatshi okunengi,” kuchaza uStress.
Intatheli kaMthunywa ikhulumisane laye njalo uMr Bones waveza ukuthi yena ukuhlabela ukwenza ngoba uyakuthanda ngakho vele uzahlabelela ukuthokozisa abalandeli bakhe.
“Ukuhlabela kuyangithokozisa ngakho mina ngihlabelela ukuthokozisa abalandeli bami.”
Uphethe ngokubonga abantu kanye labalandeli abamxhasileyo ukuthi akhuphe idlalade leli abafana loFreddy Ntodela, Ntobeko Mpfulili, Anele Dube, Daniel Mpfulili, Madala Stokisi, Alex 16 Gear Sibanda, Junior Tshoba kanye loMaboys.