uMthunywa
Nkosilathi Sibanda
EYINYE iyakhokhela ngokunqoba inkezo kazibuse ukwedlula eyinye.
Le yiyo indlela echaza isimo esikhona phakathi kweqembu leHighlanders leleDynamos kunkezo kazibuse.
Ziyadibana zombili mhlaka 18 Mabasa kumdlalo wenkezo kazibuse enkundleni yeBarbourfields.
Lokhu ngokwakuqala kumbali yenguqu ukuthi inkezo le incintiselwe koNtuthu. Lapho okuzathakazelelwa ilanga likazibuse okwakuqala kusukela ngo-1980.
IHighlanders seyanqoba inkezo le okwesitshiya galolunye njalo yacina ukuyithwala ngesizini ka-2019 lapho eyanqoba khona iDynamos nge 2-0.
Izethekeli zona zaba liqembu lakuqala ukuba yintshantshu ngo-1982.
Lonyaka, ngokuzwa kwephephandaba likazulu, inkezo le izakuba lomvuzo ophezulu, nanko kulehungahunga lokuthi inkampani yeSakunda Holdings isiqoqe ukuthi iphosele okuthile.
Ekhuluma lentatheli kaMthunywa ngoLwesithathu, umqondisi wenhlelo kuSakunda Holdings uNqobile Magwizi uthe kwelabo icele, angeke bathi bhadla ngalokhu ngoba labo bakuzwe kulihungahunga.
“Nxa kukhona okuzaphuma, sizalitshela,” kutsho uMagwizi.
Inkampani yeSakunda isekela amaqembu womabili ngemali.
Kumdlalo kazibuse lo, uMongameli welizwe uEmmerson Mnangagwa uzabe engumhlonitshwa waphezulu.
Umqeqetshi weHighlanders uMandla Mpofu, kungxoxo abelayo lephephandaba likazulu uthe yena labafana bakhe bafuna ukwandisa inkinga eqenjini leDynamos.
Ukhulume ngokuzethemba ukuthi lonyaka iDynamos izakhawula inkani ngoba ayisoke ibanqobe eMagumeni.
UMpofu uthe kuzabancane indawo.
“Ngemva kokumiswa kwemidlalo kuminyaka edluleyo, besingazi ukuthi sizaphinda sihlangane layo futhi iDynamos kunkezo le. Ithimu yami ihlezi ilinde ukuyitshaya iDynamos enkundleni yethu,” kutsho uMpofu.
“Ngendlela abafana bami abamelele ukunqoba ngayo, ngiyayizwela iDynamos.
“Akulula phela ukuthi unqobe eqenjini elitshisa njenge Dynamos.
Angeke siyithathe kancane.”
Umdlali kaMpofu othenjiweyo esiswini uNqobizitha Masuku uthe okwenza babe lomdladla wokunqoba iDynamos yikuthi badlalela eBarbourfields, phambili kwabasekeli babo.
“Sesananzelela ukuthi nxa sidlala eBarbourfields sidlala kuhle.
Kubalula ukuthi sikhabelane ibhola enkundleni le njalo nxa sidlala ngokuthanda kwethu, loba yiphi ithimu siyayinqoba kuphela,” kutsho uMasuku.
Umdlali lo ubelimele kumidlalo edluleyo.
Kukhangelelwe ukuthi ayithwalise amagabha avuzayo iDynamos ngoMvulo.
