INKULUMO YOMUMO – SIBABAZA

16 May, 2020 - 08:05 0 Views
INKULUMO YOMUMO – SIBABAZA

uMthunywa

Sikhumbuzo Dabengwa

Wazonda wadla inja umfoka Ndlovu lapho esizwa ukuba sebemtshontshele untshelelezane wakhe.  Wanxapha, wathetha wabhuqukeza etshengisa ukuzonda lokucunuka ngenxa yalesisenzo samasela lemigulukudu yesigaba sakibo.

EsiNtwini silakho ukuba silethe amagama akhomba umumo wokuzonda, ukudangala kumbe ukucunuka. Umumo olapho usuke ube ngumumo ongemuhle.

Kuqakathekile-ke ukuba sihlolisise izinkulumo ezilethwa nguzulu ngoba zisipha umumo umuntu akuwo ngaleso sikhathi funa lathi sizingenise edakeni. Nxa umuntu ezondile ulakho ukuba anxaphe kumbe akhulule inhlamba kulandela isehlakalo esimzondisileyo. Asiyikhuthazi-ke inhlamba yikho esiNtwini silazo izibabazo eziveza ukuba lumuntu kaphathekanga kuhle. Siloyisa ukuba nxa sithola lowo mumo sifunde ukuphola, ukuzithiba lokuzehlisa ukuze kungabi lakuxabana okudala ukulwa.

Akesikhangeleni izehlakalo ezilandelayo:

  1. Libhala umsebenzi esikolo. Omunye wabafundi useqedile ukuloba usesiyathwebulisa umsebenzi kumbalisi. Ngephutha uthi esedlula, agudle ugwalo lwakho luwele phansi ludabuke. Yinkulumo bani engakuvezela ukuba lumuntu uzondile ngalokhu okwenzakeleyo:
  2. ‘Nx!’
  3. ‘He-he-hee!’
  4. ‘Hawu bantu! Khangela lapho oyakhona’
  5. Lisesilindweni samabhasi okubuyela ngekhaya emva kokusebenza okukhathalisayo. Nangu ubabamkhulu ezivelela ekhaya, kalalwazi lokuba sekulomkhuhlane othelelwana ngokukhwehlelelana, ukuthimulelana kanye lokusondelelana/lixhawulana. Uyakhwehlela umuntu omdala bantu! Uke alibale ukuvala umlomo, abuye athimule nje cala celeni. Wena njengomuntu osezwile ngomkhuhlane kamatshayabhuqe lo umbonisa njani ukuba sekulesifo esibi kangaka.

 

  1. Hawu bantu! Ungangisondeleli mina, ulophepha olubi!
  2. Hatshi babamkhulu wami! Sesivelelwe ngumkhuhlane lapha. Sekukubi. Sekulomkhuhlane omubi ongafuni sisondelelane kanje. Nxa ukhwehlela kumbe uthimula zivale umlomo ngendololwane hatshi ngezandla ozabuye uzibambabambe ngazo wena labanye.
  3. Ha-a bakithi. Safa saphela ngabantu abakhwehlelela abanye.
  4. Ungubabamkhulu okukhulunywe ngaye ngaphezulu (ku-2), ubungaletha yiphi impendulo kusikhulumi lesi:
  5. Bela wena mfana, uzangitshelani mina. Kade kwasa sibona wena ungakazalwa.
  6. Hawu bantu! Sekunjalo mntanami, ukufunda akupheli jaha lakithi. Ngizakwenza njalo mnakwethu.
  7. Ophu!

Kuyavela-ke bafundi ukuba nxa sibabaza, silakho ukuveza imizwa ethile elakho ukukhokhelela kumumo othile ongadala ingxabano kumbe kuvele injabulo. Asiqhubekeni sihlolisisa inkulumo evela emuntwini ukuze sigcine ubuntu bethu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds