uMthunywa
Sikhumbuzo Dabengwa
SIYAHLANGANA njalo kule iviki bafundi abahle. Sike saletha amagama athile ekukhulumeni kuzehlakalo ezitshiyeneyo. Kuqakathekile ukuba sikhumbuzane njalo sifundisane izindlela zokukhulumisana endaweni ezehlukeneyo ngoba inengi labantu lezi izindlela abasazejwayelanga okubangela ukungezwisisani ekukhulumeni.
Nxa lezizindlela zisetshenziswe kuhle kuba lokuzwanana ekukhulumeni kanti lobuntu bethu buya busakheka kuhle.
Asihlolisiseni izindlela zokukhulumisana ezilandelayo.
1. Ulanda imali yakho ebikulahlekele komunye wabafundi okuzwakale ukuba uyidobhile endlini yokufundela. Ufika usithini kulo umfundi?
a) “Mathonzi. Yimi umnikazi wemali oyidobhe lamuhla. ”
b) ‘’ Ndoda, tshayisa lapha imali yami oyidobhileyo sengiyifuna khathesi.”
Kumitsho le yomibili, yiwuphi umutsho olobuntu, ongenza lo odobhe imali athambe ayikhuphe?
2 Udadewenu usebelethile. Kufika abangane bakhe bezombona. Bafika bathini kuye?
a) “Usuyilahle phansi inkonyane ntombi. Sitshele ngoyini?”
b) “Asengamhlophe. Ngoyini bantu?”
Kambe impendulo engamlimaza enhliziyweni yiyiphi kulezi ezimbili?
Yiphi impendulo elobuntu njalo ukutsho ngani lokho?
3 Lithunyiwe komakhelwane ukuyahambisa izimpahla ezithile. Lifika likhuleke entubeni yomuzi lisithini?
a) “Siyangena kulumuzi.”
b) “Ekuhle ngekhaya.”
4 Uvakatshele uyihlomkhulu logogo wakho ekhaya. Usuqedile ukudla. Wenza mkhuba bani wesiNtu ukutshengisa ukusuthiseka ngesiphatho sabo kuwe.
a) Uyaviyoca uqakeze izandla zombili
b) Uyabonga ngezibongo lezangelo zabo zonke.
c) Uyazithulela.
5 Uhlangana labadala endleleni yesikolo, ubabingelela usithini?
a) “Linjani badala, thina siyaphila.’’
b) “Salibonani badala.”
c) “Linjani.”
6 Umakhelwane uthenge imota enhle kakhulu. Nxa umkhulumisa ufika usithini kuye.
a)” Alala! Yaze yabanhle imota yakho mnewethu, amhlophe athe nke.”
b) “Liyakholisa lina elilemali, lithenga elikufunayo”
Impendulo elobuNtu kulezi ezimbili yiphi?
Tshono ukuba u (b) unjani.
Asihlanganeni kwelizayo bafundi sinanzelele indlela esikhuluma ngayo. Leyo indlela ilobuNtu yini?
