uMthunywa
Siphathokuhle Ngulube
Kuviki ephelileyo sixoxe ngamagama ambalwa asetshenziswa nxa kukhulunywa ngokwenda. Sixoxe ngecholo okuzinwele ezisala esiphundu eziveza ukuthi owesifazana lowo usethethwe, utshwala bezigubhu, ukuphinda imikhondo okuyikubuyela kwentombi ngakibo okokuqala ngemva kokwenda kanye lenkomo yohlanga okuyinkomo kamama.
Kule iviki sizaxoxa ngomphekiso, ukunikwa amaseko kanye lokucola.
Umphekiso
Lobu butshwala obuphekelwa intombi ukuze inikwe imvumo yokubamba izimbiza lapha ekhaya. Phela kuyazila ukuthi ufike emzini wabantu ufike udumele izimbiza zabantu bengakuphanga imvumo, lihlazo elikhulu. Mhla kuphekwe lobu utshwala yikho lapho intombi le etshengiswa khona izimbiza, imiganu lakho konke nje emkulwini.
Ukunikwa amaseko
Lokhu kutshiyene lomphekiso. Lapha kukhulunywa ngomalukazana omdala obekade evele epheka lapha ekhaya.
Ukumnika amaseko yisenzo sokumnika imvumo yokuthi usengaba lowakhe umkulu ephuma emkulwini omkhulu lapho afikele khona mhla esenda.
Ukucola
Akulanto emnandi njengokucolwa nxa ungumalukazana. Uzizwa ulesithunzi njalo labazali bayakujabulela kakhulu lokhu. Bayakholwa futhi ukuthi labaphansi bayakujabulela. Ukucola kungenziwa ngokubulala imbuzi kumbe inkomo.
Inyongo yesifuyo isetshenziswa ukuthela umlobokazi kuthi eseleyo ibotshelwe entanyeni yentombi abayithi yisanyongwana. Isenzo lesi siveza obala ukuthi umakoti wamukelekile lapha ekhaya.
Siyananzelea ke bafundi ukuthi la ngamagama abakhona enkulumeni ephathelane lokwenda kwentombi.
Ngokunjalo ke asiwasebenziseni kuhle siwafake kuhle kuzinkulumo zethu.
Asihlanganeni ngeviki elizayo, sifunde okunengi.
Salani kuhle!
