uMthunywa
Wayne Ncube
INHLANGANISO yabalimi iZimbabwe Farmers Union(ZFU) ikhuthaza abalimi abafuye inkomo ukuthi bazivikele kumkhuhlane we-measles ngoba uyehlisa uhlonzi lwenyama lenzuzo emkambo.
Umkhuhlane we-measles utholakala kuzifuyo zingadla ingcekeza yabantu okwenza zibe lezibungwana zama-tapeworms emzimbeni wazo.
Kubikwa abantu bangadla inyama engaphekekanga kuhle balakho labo ukuthi bacine behlaselwa ngumkhuhlane lo labo.
Elinye ilunga leZFU uMnumzana Mkhumbuzi Siziba uveze ukuthi inkomo zandise ukuhlaselwa ngumkhuhlane we-measles ngenxa yabantu.
“Inkomo zivame ukuhlaselwa ngumkhuhlane lo ngemva kokudla emadlelweni okutholakala khona amaqanda ama-tapeworms.
“Okubangela ukuthi endaweni lezi kutholakale amaqanda ama-tapeworms ngabantu abayabe belomkhuhlane lo abasebenzisa iganga njengezambuzi, enye indlela ebangela ukuhlaselwa ngumkhuhlane lo yikuthi inkomo zidle lapho okugeleza khona amanzi engcekeza yangaphandle.
Uqhubekele phambili uMnu Siziba esithi isifuyo esihlaselwe ngumkhuhlane lo kasibonakali ngamehlo ngoba inkomo ziyaqhubeka ziziphilela kungatshengisi umkhuhlane.
“Umkhuhlane lo awubonakali ngamehlo ngakho abalimi bakhuthazwa ukuthi bahlolise inyama nxa bengahlinza inkomo sebesiyayithengisa.
Kubikwa indlela yokwenqabela umkhuhlane lo yikuthi umlimi avimbe izifuyo zakhe zingangeni emadlelweni angahlanzekanga kumbe lapho okuhamba khona ingcekeza yangaphandle.
“Enye indlela yokuvikela izifuyo lezi yikwakha izambuzi endaweni lapho ezigcinwa khona ukwenzela ukuthi abantu bangasebenzisi iganga,” nguMnu Siziba lowo.
Inkomo ezihlaselwe ngumkhuhlane lo zilakho ukwehlisela abalimi inzuzo ekuzithengiseni ngoba zicina zithengwa ngemali ephansi kukanti kwezinye izikhathi bayayithathelwa ngoba kungavunyelwa ukuthi idliwe ngabantu.
