Nkosilathi Sibanda
UMQEQETSHI wamaWarriors uJairos Tapera ubika ukuba akukho lula ukuhlasela isitha egumeni laso ngakho umkhankaso wamaWarriors kunkezo yoMhlaba kawusoze ubengumsebenzi wokudlala ngawo.
Loba evuma ukuthi kulomqanso phambili, umqeqetshi lo kakufihli ukuba ukhangelele ukunqoba lapho iqembu lamaWarriors lidibana leleLesotho leSouth Africa kumidlalo yokukhankasela indawo kuWorld Cup ka2026.
AmaWarriors azadlala leLesotho kusasa enkundleni ye-Orlando Stadium eGoli. Iqembu leZimbabwe kalikatholi ngitsho lomdlalo owodwa wokunqoba kuqula lika-Group C kumkhankaso lo, nanko selaqeda lingutshiki lobhanqa kumidlalo emibili.
UTapera ukhulume lokhu kuntatheli zemidlalo ezingaphansi kweZimbabwe Football Association (Zifa) ngesikhathi iqembu lizilolonga okokuqala eGoli, esithi basafunda abazamelana labo kodwa kabasoze baxegise.“Sisaqoqa konke esingakuthola ngendlela langesimo samaqembu esizadlala lawo. Singakwenza lokhu, siqede, siqathanise lokuqina kweqembu lethu.
“Kodwa ngifuna ukulitshela into eyodwa, silande ukuzonqoba, hatshi okunye. Sizakwenza konke okusemandleni ethu,” kutsho umqeqetshi lo ophinda akhuze iqembu leManica Diamonds elikuligi yeCastle Lager Premier Soccer League.
UTapera ubike ukuba okwakhathesi, uyasuthiseka ngabadlali alabo njalo ubathembile ukwenza umsebenzi
“Ngijabulile ngengikubonayo enkundleni yokulolonga kwethu. Kweliphambili, ngicabanga ukuthi kuzaba ngcono. Ngibambe kulelo, elokuthi silande ukuzonqoba.”
AmaWarriors azadlala leSouth Africa eBloemfontein ngemva kwamalanga amane lidlale leLesotho.
Kusenjalo, abadlali benguqu labasekeli abakhulume lephaphandaba likazulu babike ukuthi uTapera kumele akwenze, kwenzeke ngokunqoba.
Umdlali owake wadla ubhedu kuleli, edlalela iHighlanders, uBlessing Gumiso uthe uzafika enkundleni ukuyabukela imidlalo.
“Ngizakhuluma njengabanye ukuthi imidlalo yenkezo yoMhlaba iyasetshenzelwa. Akusindima encinyane elinywayo lapho ngoba akulalizwe elifuna ukusala phandle. Ngisebenza ngihlala eGoli ngakho ngizimisele ukuthi ngiyebukela abafana bakithi. Bayaludinga usekelo lwethu,” kutsho uGumiso owadlalela iHighlanders.
Okwakhathesi, uGumiso ukhokhela aphinde aqeqetshe ekolitshini lezemidlalo eleNorthen Blues Academy, eliseSouth Africa.
Abadlali abaphethe ithemba lesizwe kumaWarriors:
Onozinti: Bernard Donovan (Chicken Inn), Martin Mapisa (Dynamos FC), Godfrey Chitsumba (Manica Diamonds)
Imvimbi: Gerald Takwara (Ohod FC), Teenage Hadebe (Konyaspor) Brendan Galloway (Plymouth Argyle), Munashe Garananga (KV Mechelen), Andrew Mbeba (Highlanders), Godknows Murwira (Caps United), Shane Maroodza (Huddersfield), Devine Lunga (Mamelodi Sundowns)
Abasenkabeni yenkundla: Marshall Munetsi (Stade de Reims), Andy Rinomhota (Rotherham United), Jordan Zemura (Udinese), Walter Musona (Simba Bhora) Daniel Msendami (Jwaneng Galaxy), Tivonge Rushesha (Reading), Joey Phuthi (Sheffield Wednesday), Tawanda Maswanhise (Leicester City)
Abagadli: Tinotenda Kadewere (FC Nantes), Tawanda Chirewa (Wolverhampton Wanderers), Douglas Mapfumo (Polokwane City) Tymon Machope (Simba Bhora).
