uMthunywa
INKEZO yeCOPA Coca-Cola ithwalwe yisikolo sakoBulawayo ngemva kweminyaka eyedlula amatshumi amabili. Kube yinjabulo isikolo seMpopoma High siphendukisa linkezo enqotshwe liqembu lamankazana.
Inkezo le yacina ukuza koNtuthu ngeminyaka yama-1990 kusatshisa isikolo seMzilikazi High.
Kuvelile ukuthi iMpopoma isithethe isihlalo sokuba yisikolo esenza kuhle kwezemidlalo, ikakhulu kunguqu. Ngaphandle kokunqoba kwamankazana, iMpopoma itshayelwa izandla lakuqembu labafana abaphethe bekunombolo yesithathu.
Besekudlule iminyaka emithathu, amankazana eMpopoma efika kusigaba sokucina kodwa esehluleka ukuthi athwale linkezo ebatshazwa kakhulu kunguqu yezikolo kuleli.
Kwenzakele ngoMgqibelo odluleyo enkundleni yeRimuka edolobheni leKadoma lapho izikolo ezimele izabelo zonke ebezincitisa kumidlalo le.
Isikolo seMpopoma sithole umvuzo wenkezo elemali engange-$10 800 lapho sitshaya isitha esidala iNyamauru High kuhlandla lembekwa nge 5-4. Izikolo lezi sezihlangane kathathu kulesi isibanga somdlalo.
Ukuphumelela kweMpopoma lokhu kuveze ukuba uhlelo lokulolonga ithalenta labantwana kuyasiza ukuthi kwakhe inguqu yohlonzi kubanga lesikolo.
Isikolo sakoBulawayo lesi silohlelo lokulolonga ithalenta ngaphansi kwezandla zikamqeqetshi uJames Rugwevere labasekeli bakhe.
URugwevere, ongumhlonitshwa kwezokuqeqetshwa kwenguqu ubike ukuba ukunqoba iCOPA Coca-Cola kuyizithelo zokulolonga gadalala.
“Abadlali bethu sebekhaliphile ebholeni. Ngemva kwesikhathi eside sibancedisa, sibalolonga sekuze kwathutsha impumela. Kuyajabulisa ukuthwala iCOPA Coca-Cola, inkezo enkulu kulazo zonke.
“Sisebenze nzima, ngiyabona manje ukuthi abantwabethu bebezimisele ukwenza kuhle. Sibatshayela izandla kulokhu,” kutsho uRugwevere.
Umqeqetshi lo uthole isicoco sokuba ngumqeqetshi waphezulu kubo bonke njalo waphiwa le-$1 500.
Labadlali bayakutsho ukuba isikolo sabo sesiyimbiza yenguqu.
“Sithola ulwazi lomdlalo olungenziyo kubaqeqetshi bethu. Sithembisa ukuthi sizaqhubekela phambili. Sithabe kubi ngokuba zintshantshu,” kutsho umdlali ongumgadli uThando Sibanda ophume kulumncintiswano ele-$1 000.
Kusenjalo, umongameli wenhlanganiso yeNational Association of Secondary Heads (Nash) uArthur Maphosa uthe izikolo azikhuthalele ukuphakamisa ithalenta labantwana.
Ngomnyaka ozayo imidlalo izaqhutshelwa esabelweni seMasvingo.
