uMthunywa
Nkosilathi Sibanda
INKEZO yeligi yeCastle Lager isibanga emaphethelweni kukhangelwe ukuthi ithwale ngelinye lamaqembu amathathu asebanga ukuba yintshantshu.
Esiqongweni sengalane yeCastle Lager kubambe iCaps United ilemiklomelo engu-55 ilandelwa yi-Chicken Inn ephethe i-53 kuthi kweyesithathu kuhlezi intshantshu zanyakenye iFC Platinum ilemiklomelo efayo.
Ngokuma kwamaqembu kuligi le, kuyavela ukuthi ngemva kwemidlalo engamatshumi amathathu lanye, amaqembu la yiwo wodwa azalwela ukuba yingqwele yebhola lenyawo kumidlalo ezayo. IMakepekepe iphethe inhlanhla ezandleni ngoba isihlohle amabhola angamatshumi amahlanu. Iqembu lakoBulawayo iChicken Inn elaba yintshantshu ka-2015 isihlohle amabhola ayisitshiyagalombili.
Umqeqetshi weCaps United uDarlington Dodo utshele uMthunywa ukuthi inkezo ngeyakhe. Uyazikhukhumeza lumqeqetshi njalo uthe kaboni lutho olungamphazamisa ukuthi akhe udumo ekuCaps United lonyaka ngokuba yintshantshu yeCastle Lager.
“Inkezo isezandleni zethu. Loba siseduzane lamaqembu asilandelayo kumiklomelo, ngibona siphendla indlela yokunqoba kumidlalo elandelayo,” kutsho uDodo.
Umqeqetshi weFC Platinum uLizwe Sweswe uthe lokhu kuchaza kuhle umdlalo kaRahman Kutsanzira ochinsa ukuthwala inkezo yeligi yeCastle Lager ngemva kwamasizini alitshumi.
“Umdlalo usesekhona, angikalahli ithawulo ngitsho. Siyalungiselela imidlalo eseleyo, sijonge ukuthi sibuthe yonke imiklomelo. Ngiyavuma ukuthi iqembu lami lisemuva kodwa asikho khatshana, sizayibuyisela ekhaya lethu inkezo le,” kutsho uSweswe.
KwezeChicken Inn kubikwa balinde ukuthi loba yini engenzakala.
“Umqeqetshi wethu uJoey Antipas ngumqeqetshi kuzwa. Uyibambile inkamba yabadlali, wanikeza ithuba lokuthi bazitshengisele. Thina njengabasekeli sithi loba yini engenzakala, ukunqoba kumbe ukudliwa,” kutsho uMcCloud ‘Moyes’ Moyo umsekeli omkhulu weChicken Inn.
Umsekeli lo uthe njengeqembu sebehlose ukulolongela imidlalo yeCaf Champions League.
“Sesiqedelana leligi yakuleli singena kumidlalo yeChampions League ngoba sizakuba zintshantshu.”
