Ethel Ncube
KULENINA lePlumtree elibonga amadlozi akwabo kulandela ukuthola usane lwalo ngemva kokulutshontshelwa lulamalanga ayisikhombisa esibhedlela sePlumtree ngoMvulo kuyonale iviki.
Inina leli kubikwa lalihambise umntwana esibhedlela sePlumtree lapho afike khona wahlangana lenina elacina limtshontshela umntwana.
Ekhuluma lentatheli omunye wezakhamizi zePlumtree uNkosazana Selina Dube ubike ukuba umntwana watshontshwa esibhedlela.
“Umama womntwana uleminyaka engu-22 yokuzalwa wahamba esibhedlela esiya ku-7 days wafika wahlangana lomama lo angamaziyo baxoxa. Umama lo ngemva kwesikhathi wamthuma ukuthi amthengele amabhanana egedini lesibhedlela.
“Wahamba wayathenga, isimanga kwaba yikuthi ephenduka wathola umama ayemtshiye lomntwana esenyamalele,” kulandisa uNkszn Dube.
Kubikwa inina elatshontsha umntwana lahle lasuka laqonda eMpandeni kunina omncane wathi usebelethile eqamba amanga aluhlaza tshoko.
Ngemva kwensuku ezimbalwa kubikwa umntwana watshisa umzimba okwenza bamusa ekilinika.
“Unina omncane wathi umntwana kahanjiswe ekilinika lapho athi efika khona bamhlola ukuba angabe esanda kubeletha bathola ukuba kazange abelethe wahle wabanjwa umntwana wathathwa,” kubika uNkszn Dube.
Elinye ilunga lemuli kametheswacala libikele iphephandaba likazulu ukuthi kabalamathe ngesenzo lesi.
“Umama lo kalamntwana, simangele esebuya elengane ethi ubelethile. Sacabanga ukuthi mhlawumbe ubezithwele loba bekungakhanyi ukuthi uzithwele kodwa wathi efika esibhedlela kwavela ukuba kulomntwana otshontshiweyo. Sethukile ngehlazo ebesesilizwa,” kutsho ilunga lemuli leli.
Intatheli ixhumane lesikhulumi samapholisa eMatabeleland South uInspector Loveness Mangena ovumileyo ukuba kulomntwana obetshontshiwe kodwa usetholakele.
“Kulenina elafika esibhedlela seMpandeni lisithi libelethe umntwana olamalanga ayisikhombisa omongikazi basola umama lo esehlulekile ukuphendula eminye imibuzo.
“Omongikazi batshayela ucingo esibhedlela sePlumtree bebuza ukuba abalamntwana omncane odingwayo na abesibhedlela sePlumtree bathi balaye. EMpandeni bathatha umntwana lo lenina elabuya laye baqonda esibhedlela sePlumtree lapho ababize khona inina elalibike ukuthi litshontshelwe usane.
“Lachaza ukuba umntanalo unjani kwabonakala ukuba ngowakhe. Umetheswacala usezandleni zamapholisa, uncedisa amapholisa ukuchwayisisa ngaloludaba,” kuphetha uInsp Mangena.
