Uncategorized

Inina lilahle inkonyane ngefasitela ehoteleni ye-Gweru

30 Nov, 2023 - 00:11 0 Views
Inina lilahle  inkonyane ngefasitela ehoteleni ye-Gweru

uMthunywa

Langelihle Moyo

AMAPHOLSA enkabazwe edolobheni leGweru, adinga owesifazane okucatshangelwa ukuthi uthengisa umzimba osolwa ukuthi nguye owalahla inkonyane eyatholakala ehoteleni yeGweru mhlaka 16 kuyonale inyanga.

Kubikwa mhlaka 16 kuyonale inyanga ngehola lika-12, ngesikhathi unogada weMidlands Hotel ebhoda ekhangela indawo wathola inkonyane yomuntu, okwakukhanya ukuthi iphoswe ngefasitela lehoteleni. Lokhu kucatshangelwa ukuthi kwenziwa ngomunye wabathengisa umzimba uTheresa Augusto.

Kuvezwe ukuthi ngemva kokubonakala kwenkonyane le, amapholisa abikelwa ngodaba lolu ahle aphangisa afika ehoteleni. Uphenyo lwamapholisa lukhomba uTheresa ngoba nguye owayeke wabonakala ekhanya esezinhlungwini. Okunye okutshengisa ukuthi nguye owakwenzayo yikutholakala kwamanyathela elegazi endlini ayeyisebenzisa ehoteleni.

Isikhulumi samapholisa enkabazwe uInspector Emmanuel Mahoko, uthe inkonyane yomuntu le ithethwe yahanjiswa eGweru Provincial Hospital Mortuary kumelelwe ukuthi kwenziwe i-postmoterm.  

“Inkonyane yomuntu le ithethwe yahanjiswa eGweru Provincial Hospital Mortuary, kumelelwe ukuthi sihlolwe (postmoterm),” kutsho uInsp Mahoko.

Esephetha uthe ucela ongaba lomkhondo kumbe ulwazi ngokubonakala kukamsolwa azise amapholisa.

“Sicela uzulu ancedisane lamapholisa, nxa kukhona ololwazi ngokubonakala kukaTheresa Augusto atshele amapholisa. Okunye njalo ngithanda ukuxwayisa uzulu ukuthi ukubeletha ulahle umntwana licala elikhulu, njalo elilesigwebo,” kuphetha uInsp Mahoko

Share This:

Sponsored Links