Uncategorized

Inina lidinga inotho…Iminyaka emibili ephila ngokudla amalahle

16 Jun, 2022 - 00:06 0 Views
Inina lidinga inotho…Iminyaka emibili ephila ngokudla amalahle USenzeni Sibanda

uMthunywa

Ethel Ncube
KULENINA lesigabeni seNsuza esabelweni seMatabeleland North elitshiye abantu bequmeke umlomo kulandela ukuzwa ukuba selileminyaka emibili liphila ngokudla amalahle ukuze lithole inotho, uMthunywa ukuzwile lokhu.

Inina leli, uNkosazana Senzeni Sibanda wesiqintini sakoMentshisi, eNsuza kuvele sobala ukuba ubesephila ngokudla amalahle ukuze abe lenotho.

UMthunywa uxhumane lomunye wezakhamizi uMnumzana Gift Moyo obike ukuba kuyesabeka ukuthi umuntu angaphila ngokudla amalahle ngoba efuna nje inotho.

amalahle

“UMphurofethi uMutumwa ubelenkonzo khonapha ngempelaviki. Abantu babuye ngobunengi babo bezodinga uncedo njengoba kukunengi esesikuzwile ngaye. USenzeni kuvele ukuthi wahamba wayadinga umuthi wenotho enyangeni kanti usezokhela amalahle ekhanda.

“Inyanga ahamba kuyo yathi kadle amalahle nsukuzonke ekuseni wakwenza lokhu kodwa kwacina kumvala ukuthi alangazelele ukudla, ubesevuka ekuseni adle amalahle lawo angabe esadla okunye ukudla.

“Umphurofethi wachaza ukuthi kulomuntu osephila impilo engaphilwa layinyamazana okuyikho okwenza wayaphambili ukuze ayoncediswa,” kubika uMnu Moyo.

Ekhuluma lentatheli omunye obesenkozweni le uNkosazana Sinikiwe Dube uveze ukuba lindaba inzima.

“ENsuza lapha asilankani ngesikubone lapha. Abanye besebeleminyaka begula bebethandazelwa ubone umuntu esesukuma eqala ukuzama ukuhamba kodwa esithinte kakhulu ngeyenina ebeseliphila ngokudla amalahle. Ekuqaleni besibona angathi yikudlala kodwa lidle phose i-5kg yamalahle sikhangele ethi yena yikho ukudla kwakhe okunye lokhu kungena nzima,” kutsho uNkszn Dube.

Umphurofethi Emmanuel Mutumwa

Intatheli ixhumane lenina ebeseliphila ngamalahle uNkszn Sibanda othe kuliqiniso ukuthi ubesephila ngokudla amalahle.

“Impilo inzima, ngeke ngilandise okunengi ngoba uncedo sengilutholile. Amalahle bengiwadla nsukuzonke ngingaselandaba ngitsho lokunye ukudla. Ngeke ngikukhulume okunengi ngoba lalamuhla ngisadidekile kancane,” kubika uNkszn Sibanda.

UMthunywa uxhumane loMphurofethi uEmmanuel Mutumwa owathandazela umama lo obike ukuba ukhululekile ukusiza.

“Ngangihambele eNsuza silenkonzo endaweni le, abantu beza ngobunengi babo lenhlupho zabo ezitshiyeneyo.

“Umama lo obesidla amalahle ubesehluphekile kakhulu ngamthandazela ukuba asile,” kuphetha uMphurofethi Mutumwa.

Share This:

Sponsored Links