uMthunywa
Thokozile Mbedzi
KULENINA elileminyaka engu-34 yokuzalwa leSiabuwa eBinga elibulele umntanalo oleminyaka emithathu andubana lihlale phezulu kwesidumbu lingakutshayi indiva.
Isehlakalo lesi senzakale kuviki ephelileyo.
Kubikwa inina leli, elisesithenjini lavuka lingazwisiseki ukuthi likhuluma ngani.
Unyanewabo wasuka wayakukha amanzi, ekuphendukeni kwakhe ngemva kwehola wamfica engekho lomntwana wasesiyabikela uyihlomdala ukuthi unyanewabo usuke lomntwana futhi ubengazwisisiseki indlela abesenza ngayo.
Ekhuluma lentatheli kaMthunywa uNkosazana Molly Mudenda uthe babone imbedumehlwana abangakaze bayibone lokhe bathwetshulwa yingwe.
“Sibone okuzilayo, kangikaze ngikubone lokhu. Umakhelwane wethu uvuke engacaci ukuba uhloseni enkulumeni etshintshile engazwisiseki. Unyanewabo wazama ukuba amkhulumise kodwa wangazwakali, waphuma esiyakukha amanzi.
“Ekuphendukeni kwakhe wafica engekho lomntanakhe oleminyaka emithathu, yikho ukudingisisa ukuba angabe eyengaphi lomntwana.
“Unyanewabo wasuka wayabikela umnewabo womkakhe uAgain Sibanda bancedisana ukulonda inyawo zakhe bathe sebehambe umango ongaba ngamakhilomitha amabili bamfica esebulele umntwana ehlezi phezulu kwesidumbu,” kulandisa uNkszn Mudenda.
Kubikwa ababili laba bazama ukuthi bathi babuyele ngekhaya kodwa wavuka ubhova behluleka ukumdonsa baze bancediswa ngabanye ababezidlulela ukumdonsa bahambe laye kunye lesidumbu somntwana.
Isikhulumi samapholisa esabelweni seMatabeleland North uInspector Glory Banda ebuzwa ngodaba lolu uthe amapholisa asachwayisisa ngodaba lolu.
“Udaba lwenina elibulale umntanalo solufikile ehofisini yethu.
“Inina leli lisezandleni zamapholisa njalo asaphenyisisa ngalo. Sikhuthaza amalunga ezimuli ezehlukeneyo ukuthi nxa kungenzakala kube lamalunga angaphilanga kuhle engqondweni bazame ukubona ukuthi bayathola imithi yabo,” kuphetha uInsp Banda.
