AMAPHOLISA elizweni leSouth Africa athungatha umkhondo wenina leZimbabwe elileminyaka engu-33 ngemva kokutholakala kwesidumbu esiqunyiweyo esikhwameni eWattville, eBenoni, ese-East Rand. Lokhu kuvezwe ngabaqaphi abalwa lobugebengu ngoMgqibelo, njalo bahle baqalisa ukuphenyisisa ukuze kubotshwe owesifazana lo othintekayo.
“Abaqaphi babebhoda baze badibane lowesifazana lowesilisa befuqa i-suitcase eyayikhanya inzima. Ababili laba bamiswa kwavulwa isikhwama, owesifazana weZimbabwe lo wahle wabaleka kwatholakala isidumbu esicuyiweyo phakathi. Owesilisa oleminyaka engu-53 wahle wabotshwa,” kutsho uNevhuhulwi ngoMgqibelo emini.
Ukucubungula kwabaphenyisisa ngodaba lolu kuveze ukuthi owesifazana wayeyintombi kamuyi njalo bebehlala bonke eActonville.”
Kubikwa ngesikhathi kuphenyisiswa kuvele ukuthi umetheswacala uthe basa ikhanda lenyawo kwenye inyanga eMandleni.
Amapholisa adinga ongancedisa ukuthi kwaziwe ukuthi inina leli lingaphi abikele amapholisa aseduzane laye. Lonke ulwazi oluzatholakala luzagodlwa. – Ubulembu
