uMthunywa
Nkosilathi Sibanda
USENQOBE yonke imncintiswano yokugijima kuleli u-Oliver Chitate, nanko usephinde waba yintshantshu ye10KM Liquor Hub Fun Run kuhlandla labesifazane okweminyaka emibili ilandelana.
UChitate, ogijimela iqembu leZRP, utshaye intambo ngemva kwemizuzu engu-36, lemzuzwana engu-18 ngeSonto ekuseni kulumjaho oqhutshelwe enzikini yedolobho lakoBulawayo.
Kuhlandla labesilisa, uWellington Varevi oweBlack Rhinos ubatshiye bonke ngemva komzuzu engu-28:40.
Kwabagijima nge-wheelchair, kunqobe uElford Moyo (27:08) loStella Jongwe (38:27).
Ekhuluma lentatheli kaMthunywa ngemva komncintiswano, uChitate uthe ukunqoba kwakhe kube yikhisimusi eze masinyane.
Uthole umvuzo we-R3 500.
“Ngize lapha ukuzabamba isicoco sami. Ngiyathaba ukubana ngenelise ukusibamba njalo ngokunqoba engikwenzileyo. Yisipho sami sekhisimusi lesi,” kutsho uChitate ekhipha inyembezi zenjabulo.
Ulandelwe nguCaroline Mhandu (36:46) lo Emmilia Mukunguta (37:56).
Umjaho weLiquor Hub lo uqoqwe ngemva kweviki kuqoqwe njalo omunye umncintiswano oweHope Fountain Marathon.
Kukhangelelwe ukuthi ngomnyaka ozayo kuqoqwe imincintiswano eminengi koBulawayo nanko kulindwe ukuphenduka kweNkulumane Old Mutual Race lowePPC Matopos Ultra Marathon ngoMabasa.
