uMthunywa
Ethel Ncube
KULENINA elileminyaka engu-36 elidabuka esigabeni seKhame eBulilima ePlumtree elaziwa ngezokuhlabela ingoma zokholo elithole isicoco seSong of the Year kumncintiswano oqhutshwe kumsakazo we-Amaqhawanentaba.
UMatho Majola owakhupha idlalade lakhe lokuqala ngomnyaka ka-2021 uthe ubengakholwa ukuthi nguye ozahamba lesicoco seSong of the Year somnyaka ka2022 ngengoma yakhe ethi “Impilo yami.”
UMajola osekhuphe ingoma ezingu-8 uthe ingoma zakhe zonke ziyintshumayelo empilweni zabantu, ziyaduduza ziphinde zakhe yikho abantu bezamukela ngezandla zombili.
“Ingoma yami ethi: Impilo yami, ithandwe ngabanengi njalo ingenze ngamukela isicoco seSong of the Year.
“Ngibonga umsakazo we-Amaqhawanentaba abangisekele kakhulu kuhambo lolu, futhi lami ngiyathembisa ukuthi ngizaqhubeka ngisebenza nzima ukuze umculo wami uthuthuke usiya phambili,” kutsho uMajola.
Uqhubekele phambili exwayisa abanye abahlabeleli ukuthi babekezele ngoba indima le inzima.
“Ekuhlabeleni uhlangana lezinto ezinengi ezingakubisela emuva kodwa okukhulu yikukhangela phambili ube lesibindi.
Uphethe ngokucela uzulu ukuthi abaxhase njengabahlabeleli ukuze bakhule kwezomculo.
“Ngifisa ukubonga kuqala abalandeli bami abangisekeleyo ngaze ngathola isicoco lesi. Ngifisa ukubonga futhi labanye abaculi engadlula ezandleni zabo.
“Kubalandeli bethu ngicela baqhubeke besixhasa ukuze siqhubeke siphakamisa ilizwe lethu ngezomculo kweleMzansi,” nguMajola lo.
