uMthunywa
Joel Ndlovu
KULENINA elileminyaka yokuzalwa engu- 51 elihlala elokitshini le-New Lobengula koBulawayo elimiswe emthethwandaba weTredgold ngoMvulo lisetheswa icala lokutholakala lihlanyele isihlahla sembanje egumeni.
Inkundla izwe ukuba mhlaka 23 Mfumfu ngehola lesihlanu amapholisa avela kuhlangothi lwe-CID Drugs and Narcotics koBulawayo ancwetshwa indlebe ukuba umsolwa, uDorcus Mhlinzwa (51) uhlanyele imbanje egumeni lakhe.
Elandela lolulwazi, amapholisa aya lapho okuhlala khona uMhlinzwa afica kulesihlahla leso.
Isihlahlanyana leso kubikwa besiside okungaba yi- 1,4 metres.
Umantshi uMnumzana Sherpherd Munjanja utshele uMhlinzwa ukuthi aphenduke emthethwandaba mhlaka 30 Mfumfu kuzoqediswa ukuthoniswa kwecala leli.
Kusenjalo kulamadoda amabili elokitshini leMakokoba koBulawayo amiswe enkantolo ngoMvulo ebhekane lecala lokutshontsha izicathulo zichayiwe.
Abasolwa uRicardo Mpofu (28) lo Marvelous Moyo (29) kubikwa bafika ku-11th street elokitshini elifanayo mhlaka 23 Mfumfu ngehola lika-9 ekuseni batshontsha izicathulo ezazichaywe ethangweni ezibiza imali engange $2 500.
Kubikwa uMpofu wangena watshontsha izicathulo, uMoyo yena wasala phandle ekhangele abantu.
Umantshi uMnu Sherpherd Munjanja udlulisele phambili ukuthoniswa kwecala kumhlaka 2 Lwezi.
