uMthunywa
Thokozile Mbedzi
KULENINA lelokitshini lePumula South koBulawayo okubikwa lizenze elingenelisi ukuphendula umlayezo kamakhalekhukhwini labiza umfana oleminyaka engu-8 ukuthi azolincedisa lamdonsela endlini lamdlwengula.
Inina leli, uNtombiyosizo Ndlovu oleminyaka engu-41 yokuzalwa ubotshwe kuviki ephelileyo esetheswa icala lokudlwengula umntwana oleminyaka engu-8.
Uthethwe ngamapholisa
Kuzwakale ukuba phakathi kwenyanga kaMpalakazi nyakenye, umamangala wayedlala phandle umetheswacala wambiza ukuthi azomncedisa ukuphendula umlayezo kumakhalekhukhwini wakhe andubana amdonsele endlini amhlukuluze.
Ekhuluma lentatheli kaMthunywa uAleta Masuku uthe isenzo senina leli siyethusa.
“Njengabomakhelwane kasilankani silapha ukuthi umuntu okumele abe ngumama emntwananeni nguye ophenduke waba yisilo, ngempela uthango ludla amakhomane.
“UMaNdlovu kukhanya wabona umntwana lo edlala phandle wambiza ukuthi azomncedisa ukuphendula umlayezo kumakhalekhukhwini.
“Umntwana wahamba esemnyameni umama lo wafika wambamba ngesandla wamdonsela endlini yakhe yokulala wasehlubula impahla walala embhedeni wambuza ukuthi kukhona akwaziyo ngezothando lokuthi ulentombi yini andubana amhlukuluze kanye engazivikelanga,” kuchaza uMasuku.
Kuzwakale ukuba ithumba lize labhokoka ugogo womntwana lo esembuza ukuthi kungani ehlala ebizwa nguMaNdlovu.
Kubikwa umntwana wachaza konke okwakusenzakala phakathi kwakhe loMaNdlovu okwenza ugogo wahle wayabikela amapholisa.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi solufikile ehofisini yakhe.
“Sibophe inina elileminyaka engu-41 silethesa icala lokudlwengula umntwana ongumfana oleminyaka engu-8.
“Sixwayisa abadala kunye labancane ukuthi bangesabi ukubikela amapholisa ngamacala okuhlukuluzwa.
“Sixwayisa njalo abazali ukuba bananzelele abantwana kakhulu njalo babe lobudlelwano obuhle labo ukuze benelise ukunanzelela lapho sokukhona osekuguqukile ebantwaneni,” kuphetha uInsp Ncube.
