uMthunywa
Kaselandaba lami, kangisamthembi
NGITHEMBA uqine saka Khulu ngoba lami ngiqinile. Umkami Khulu kaselandaba lami ngitsho. Uyanyamalala engatshayisa emsebenzini njalo nxa ngimfonela kaphenduli ucingo lwami. Nxa engafika ngingambuza ukuthi kungani engaphenduli ucingo lwami uthi ubephelelwe li-battery. Kangisamthembi ngitsho ngenxa yezenzo zakhe.
Impendulo
Ukuthatha kuchaza ukuthi impilo yakho usuyiphila lomunye umuntu, akusela wena nje wedwa. Kubalulekile ukuthi umkakho akwazi lokhu. Ukungatholakali kwakhe ecingweni akuchazi nje ukuthi kukhona akwenzayo eceleni kodwa sekulengozi ngakho kubalulekile ukuthi ukwazi ukuthi ungamfonela umthole ecingweni ngaso sonke isikhathi. Ake lilukhulume loludaba ubone ukuthi katshintshi yini. Ungabikela abadala nxa ungaboni mehluko kuzenzo zakhe.
Usemithise omunye umfazi
Ngifonelwe ngowesifazane engazisa ngokuthandana kwakhe lomkami lokuthi ukhulelwe ingane yakhe.
Umkami akazange aphikise ngimbuza ngalokhu. Angazi ngenzenjani ngalesi simo. Lindaba iyangidla ngaphakathi. Angazi loba ngihlale laye loba ngihambe. Kodwa futhi nxa ngihamba kuzokwenzakalani ebantwaneni bami?
Impendulo
Umtshado wakhiwa ngokuhloniphana. Kuyamangalisa ukuthi lo wesifazane uyithethe ngaphi inombolo yakho yocingo aze akufonele. Zibuze lowo mbuzo. Kubili ongakwenza. Ungahlala emtshadweni wakho umxolele futhi ubuyisane lomkakho ngalokhu akwenzileyo impilo iqhubeke. Loba ungaphuma emtshadweni ngoba umkakho katshengisi ukukuhlonipha njengonkosikazi wakhe. Kubalulekile futhi lokubonana lodokotela wengqondo ngoba izinto ezinjengalezi zicina zikwenza uzibone angathi ungunkosikazi nje ongasi walutho. Kubalulekile ukuzelapha wena kuqala ngaphambi kokuthi uthathe isinqumo esingatshintsha impilo yakho yonke.
Ngenze njani Khulu?
Khulu ngithemba uphilile. Ngiyindoda esikhulile sibili ngakho uhlupho lwami yikuthi sengihlangane labesifazana baze bababane bezithwala kuthi nxa umkhubulo usulenyanga ezinhlanu aswele. Ngicela ungisize ungichazele ukuthi ngingenza njani ukuze ngelatshwe kulokhu.
Impendulo
Mzukulu uhlupho lwakho lukhulu sibili kodwa luyalungiseka. Khona ngokomkhuba owesifazana angaswela uyelatshwa ngokugeziswa, ngakho kufanele uqale ukwenze lokhu ube ususelatshwa lawe. Lapha kungenzeka ukuthi kube yisifungo esenzakala emdenini wakini ngakho kufanele ukuthi selatshwe kumbe kwelatshwe wena ngokomkhuba. Ukwelatshwa lokhu kudinga ithambo ledolo lendlulamithi lezinye izihlahla. Ngalokhu kungcono ungidinge ngikuchazele mathupha ngoba indaba yakho inde.
