uMthunywa
Umkami usemithise omunye
NGIFONELWE ngowesifazane engazisa ukuthi ubethandana lomkami lokuthi uzithwele. Umkami ngithe ngimbuza ngalokhu akaphikisanga. Angazi ukuthi ngenzenjani ngalesi simo. Lindaba iyangidla ngaphakathi.
Angisazi ukuthi ngenzeni, ngihlale emtshadweni loba ngehlukane laye. Kodwa okuphinda kungidle yikuthi ngingahamba abantwabami bazakwenzanjani?
Impendulo
Umtshado wakhiwa ngokuhloniphana. Kuyamangalisa ukuthi owesifazana lo uyithethe ngaphi inombolo yakho yocingo aze akufonele. Zibuze lowo mbuzo. Kubili ongakwenza. Ungahlala endlini yakho uxole uphinde ubuyisane lomkakho ngalokhu akwenzileyo impilo iqhubekele phambili loba wehlukane laye.
Kubalulekile futhi ukubonana lodokotela wengqondo ngoba izinto ezinjengalezi zicina zikwenza uzibone ungunkosikazi ongasi walutho. Kubalulekile ukuzelapha wena kuqala ngaphambi kokuthi uthathe isinqumo esingatshintsha impilo yakho yonke.
Sisonta emabandleni ehlukeneyo
Ngithemba uphilile Khulu. Ngicela ukubuza ukuthi kuqondile yini ukuthi siye emasontweni ehlukeneyo lomkami? Mina ngisonta emabandleni akulezinsuku omoya kukanti yena ungena ibandla elidala. Ukungena amasonto ehlukeneyo kwenza singaboni impilo ngaso linye. Abantwabethu kwenye iviki bahamba lami kukanti kwenye bahamba loyise. Ngenzeni Khulu? Mina ngilesifiso sokuthi sisonte ndawonye lomkami.
Impendulo
Ngiziphilele mzukulu. Esintwini sakithi umfazi uthi angenda alandele umkakhe kubandla alingenayo.
Kungakho-ke mzukulu kumele wena usuke kwelakho ibandla uyengena lomkakho lihambe ndawonye labantwabenu ukuze lingacini liphambanisa abantwabenu. Abantwana kumele baye kubandla likayise, angithe nje yikho bethatha isibongo sikayise ndawonye lawe.
Sizithwele intombi singatshadanga
Ngingowesilisa oleminyaka yokuzalwa engu-28. Sobabili lesithandwa sami singamaKhristu. Silingekile usisi wasezithwala. Le yinyanga yesithathu futhi asikabatsheli ebemuli yethu ngoba siyesaba. Ubaba ngumfundisi webandla kanti labakwabo bangamakholwa. Inkinga yikuthi sobabili siyazi ukuthi bazakuthi kumele sitshade kanti thina siyazi asikakulungeli lokho. Sicela usizo.
Impendulo
Ukukhula kuhambisana lokwenza amaphutha. Okuhle futhi lelikwaziyo njengabazalwane yikuthi uNkulunkulu uyasixolela iziphambeko zethu sonke kungakhathalekile ukuthi simonele kanganani. Abakwenu ngokufanayo kanye lebandla bazalixolela ngemva kwesikhathi. Okubalulekileyo nje yikuthi lizehlise phambi kwabo litshengise ukuzisola. Lehlise isithunzi imideni yenu kodwa-ke impilo iyaqhubeka. Phangisani libazise ngokuwa kwenu singakakhanyi isisu.
