uMthunywa
Ufuna ngikhuphe isisu
Ngileminyaka engu-27, silenyanga eziyisitshiyagalombili sithandana lejaha lami. Ngihlangana laye wayesithi wehlukana lonkosikazi wakhe. Khathesi ngikhulelwe ingane yakhe kodwa usesithi usecabanga ukubuyelelana lonkosikazi wakhe njalo labakibo bayamsekela.
Uthi ngenza ngabomo ukuzithwala kungakho uthi kumele ngisikhuphe isisu. Ngiyabazi ubunzima bokukhuliswa ngumzali oyedwa ngakho ngilovalo lokukhulisa umntwana ngingedwa kodwa futhi unembeza wami kawuvumelani lakho ukuthi ngikhuphe isisu. Ngenzenjani?
Impendulo:
Mzukulu ngidabuke kakhulu ngibala incwadi yakho. Kusobala ukuthi kazange ehlukane lonkosikazi ekuqaleni lumuntu othandana laye. Kuyenzeka ukuthi babexabene nje kodwa khathesi sebelungisile izinto. Wena-ke mzukulu kwakumele ube leqiniso lokuthi wehlukene lonkosikazi wakhe njengokutsho kwakhe. Undoda lo wenze ukungathembeki kakhulu ngokuya lawe emacansini esazi ukuthi akaqedanga emuva. Kuyenzakala-ke lokhu empilweni. Okubalulekileyo khathesi ngumntwana osumthwele. Umntwana loba efike njani uyisibusiso esikhulu ngakho ungavumeli ukuthi akwenzise intando yakhe loba usazi ukuthi ukukhipha isisu kuyinto embi. Yisikhathi sokuthi umele iqiniso. Yebo ulenzile iphutha wathandana lomuntu ongelaqiniso kodwa kulomphefumulo okumele uwucabangele. Lawe ukhuliswe ngumzali oyedwa kodwa-ke nanku uyaphila. Ngabe kwenzakalani ukuba umama wakho wakukhipha ngoba esesaba ukukukhulisa?
Umkami ubuya lomsebenzi ngekhaya
Unkosikazi wami usanda kuthola umsebenzi omenza umphathi lomholisa kuhle. Angila nkinga ngalokho.
Yinye nje inkinga yami, yikuthi ubuya lomsebenzi ngekhaya. Akasazazi izingane futhi lami ngilokumkhohlwa njengenkosikazi yami ngenxa yokungatholakali kwakhe. Uhlezi engosebenzayo lanxa engekhaya kukanti kwezinye izikhathi uyabe engekho esemsebenzini. Into enhle njengomsebenzi isiqala ukuba yisiqalekiso.
Uselenkulumo zokuthi mina ngilomona ngokuthuthuka kwakhe. Iyangihlukumeza indlela asekhuluma ngayo.
Impendulo:
Kuyinto enhle ukuthi uyamjabulela unkosikazi ngokuphakama kwakhe emsebenzini. Kuhle futhi ukuthi umazise ngalokho ukuze angacabangi ukuthi ulobukhwele. Kungenzeka ngempela ukuthi ngenxa yokuthi ngumsebenzi omutsha akuwo uzama ngazo zonke indlela ukuphumelela kuwo okwenza acine engasaboni ubungozi bokusebenza kwakhe ngokweqileyo.
Alikho iphutha ngokusebenza nzima kodwa kubalulekile ukuthi enze isiqiniseko sokuthi akaphazamisi inhlelo zangekhaya ngenxa yomsebenzi.
Kumele aqale ngezinto ezincane njengokuthi azame ukwenza wonke umsebenzi emsebenzini ukuze nxa efika ngekhaya abe ngumama opheleleyo. Nxa kungalungi lokho ngenxa yomsebenzi alawo angazama ukusebenza nxa abantwana sebelele ukuze basithokozele isikhathi lonina. Kubalulekile ukuthi aziphe isikhathi somsebenzi, esabantwana kanye lesakho ukuze kungabi lokungunguna.
Ngiphilela umkami labantwabami
Sesileminyaka citshe engu-9 satshada njalo sabusiswa ngabantwana ababili. Akakaze angihluphe ngalutho. Yena nguye osebenzayo, njengoba savumelana ukuthi mina nginakekele abantwana lomuzi wethu. Wenza konke engicabanga ukuthi kufanele kwenziwe yindoda.
Inkinga nje yikuthi ngilesizungu emtshadweni wami. Ngazinikela kuye lakulo umtshado ngale ndlela yokuthi yonke impilo ngicabanga umkami labantwabami. Angilampilo ngaphandle kwabo. Konke engikwenzayo nginakana ukujabulisa bona. Kodwa mina angiselawo awami amaphupho, lokhu kungiphatha kubi. Ngicela ungisize.
IMPENDULO:
Akulula ukuzibona usuginywe ngumtshado unganakile. Lokhu kwenzeka kakhulu ebantwini besifazane ngoba bangabantu abazinikelayo ngomdabuko. Kuyinto enhle ukuthi uyayibona linkinga kusemanje.
Kufanele uzinikele emtshadweni wakho ngokupheleleyo kodwa ungazikhohlwa phela lawe. Qala ngokuthi kube lelanga nje elilodwa lakho maviki onke lapho owenza khona loba yini oyithandayo eqondene lawe. Kungaba yikuyazivocavoca loba yikuya ngakini uyebona izihlobo zakho okwaziyo ukuthi ziyakuthanda. Zijwayeze ukuba lesikhathi esithi wena.
Nxa wawulabangane ngaphambi kokutshada vuselela lobo bungane. Kuyingozi enkulu ukulahlekelwa yimpilo yakho usesemtshadweni ngenhloso yokujabulisa umkakho. Hlala phansi uvuselele konke okwakuliphupho lakho. Kungaba yikuqhubeka ngezifundo, ukuqala ibhizimusi loba ukubuyela emsebenzini nje. Cabangisisa lokuthi njengoba ungasasebenzi nje, wawuyingxenye engakanani ekuthatheni leso sinqumo? Hlala phansi lomkakho umtshele inkinga okhangelane layo.
