uMthunywa
Ngimzilela isikhathi esinganani umkami
Ngingowesifazane owafelwa ngumkakhe ngisemncane. Uhlupho yikuthi angikwazi ukuthi kumele ngimzilele isikhathi esinganani ngaphambi kokuthi ngibe lomunye umlibazisi. Kangifuni ukwenza into ezaphoxa abakibo komkami. Ngenzenjani?
Impendulo:
Kubuhlungu ukutshiywa yisithandwa sakho usasithanda. Kodwa loba kunjalo ngeke uzile impilo yakho yonke.
Ekadeni wawuzilela umkakho okomnyaka owodwa ngemva kwalokho ube usukhitshwa-ke impahla zenzilo ezimnyama. Kodwa-ke lamhlanje mzukulu ngibona angathi isikhathi sokuzila sakho sizokwaziwa nguwe kuphela ngoba nguwe owazi ukujula kobuhlungu obuzwayo. Kuyinto encomekayo ukuthanda abakwenuzala kodwa ngelinye ilanga kumele ubazise ukuthi uzimisele ukuqhubeka ngempilo njengomuntu osemncane.
Ngilesiqiniseko sokuthi ngeke bame endleleni yakho ngoba ngilethemba lokuthi labo bayakujabulela ukukubona ujabula kanye lokuqhubeka ngempilo.
Inkolo zethu zehlukene, kuyasixabanisa
Silomnyaka sitshadile lomkami. Ngatshada laye ngisazi mhlophe ukuthi sehlukene ezintweni ezinengi ezigoqela inkolo lokuziphatha nje. Ngangizitshela ukuthi ngemva komtshado uzatshintsha. Kodwa kuyafana nje, phezulu kwalokhu sihlala sixabana. Eqinisweni sengibona angathi ngazifaka enkingeni ngokutshada lomuntu esilenkolo ezehlukeneyo. Ngibona sengathi ngazibophela kuye ngizitshela ukuthi izinto engingazithandiyo ngaye uzazitshintsha ngemva komtshado.
Impendulo:
Kuyinto ejwayelekileyo njalo esingayikhuthaziyo ukucabanga ukuthi umtshado uzalungisa obekungahambi kuhle lingakatshadi. Ayikho into edlula ukuhlala phansi likhulume izinto elizifuna emtshadweni ngaphambi kokuthi litshade. Ngaleyondlela ungena emtshadweni usazi umuntu wakho azenelisa ukukwenza langeke akwenze. Okufanele ukwenze manje yikukhuluma lomkakho ngaloludaba. Phakathi kwenu lobabili kumele liphume lesicazululo sodaba lwenu.
Umkami uthanda izigqoko
Ngilenkinga lomkami Khulu ngoba kangihloniphi njengomkakhe. Sengimbambe izikhathi ezinengi engathembekile kimi kodwa uvele ayimbambathe lindaba nxa ngifisa ukuthi sikhulume ngayo. Uvele nje ayenze sengathi akwenzakalanga lutho empilweni. Ngiyamxolela impilo iqhubeke, aphinde futhi enze adume ngakho. Khathesi angisakwazi ukuthi ngenzeni ukuze umkami abone ukuthi ayingithokozisi linto yakhe.
Kulezinsuku ngivele nje ngibe lolaka nxa ngimkhangela ngoba ngivele ngifikelwe isithombe sabo bonke laba bantu besifazane abathandayo mina ngisempilweni yakhe. Kuyini kambe Khulu engingakwenziyo ngempela?
Impendulo:
Kusobala ukuthi umkakho useze wajwayela ukwenza loba yini ayifunayo ngoba uyazi ukuthi unkosikazi wakhe ngeke enze lutho. Nguwe owamjwayezayo limpilo ngokungenzi lutho nxa esenza lumkhuba wakhe.
Mphumele egcekeni ukuthi nxa engatshintshi indlela yakhe yokwenza wena ngeke ukumele. Khumbula mzukulu kulezinsuku isiminengi imikhuhlane ethelelwana emacansini kungakho lokhu kungafaka impilakahle yakho engozini.
