uMthunywa
Ngehluleka ukuzithiba kwabesifazane
Sesileminyaka emine sitshadile lonkosikazi wami. Ngikhathele yikuhlala ngixabana laye ngento eyodwa.
Uhlupho lwami yikuthi ngehluleka ukuzibamba ebantwini besifazane. Yikho lokhu okuhlala kusixabanisa lomkami njalo umtshado wami usengozini yokuchitheka. Ngiyafisa Khulu ukuthi ngekele ukukwenza lokhu.
Impendulo:
Ngiyabonga mzukulu ngokungibhalela, okuhle yikuthi uyakwazi ukuba ulohlupho. Akula omunye umuntu ngaphandle kwakho olamandla okulwela umtshado wakho. Lokhu kufana lokuthi nxa usazi ukuba uyabuthanda utshwala, kumele uhambele khatshana lendawo lapho okunathwa khona utshwala ukuze ungalingeki.
Wena lomkakho kumele lichithe isikhathi esinengi ndawonye lonkosikazi wakho. Yakha ubungane obuqinileyo lonkosikazi wakho, lihlale lindawonye izikhathi zonke.
Ngimthanda kakhulu umkami
Khulu ngithemba uqinile ngoba lami ngiqinile lanxa nje umqando usithwalise nzima lezinsuku. Khulu ngilobole ngenyanga kaMpalakazi nyakenye, ngiyamthanda kakhulu unkosikazi wami. Indlela engimthanda ngayo unkosikazi wami yethusa abangakithi sebeze bebona angathi wangidlisa.
Abanye bathi kuzadlula kodwa mina ngikholwa ukuthi akusoze kudlule, ngoba ngimthanda okwedlulisileyo.
Laye unkosikazi uyakwazi ukuthi ngiyamthanda njalo ngingamenzela loba yini. Angazi Khulu ukuthi loluthando ngolokudliswa loba luthando nje?
Impendulo
Mzukulu lami njengawe ngiziphilele ikhaza nje kuphela. Mina kangiboni hlupho ngitsho ngendlela othanda ngayo umkakho ngaphandle nxa kukhona okunye ongakuvezanga kule incwadi. Phela kuhle ukuthi abantu bathandane. Kuyinto enhle lencomekayo le oyenzayo.
Kungenzakala futhi ukuthi abangakini bathi udlisiwe ngoba bengajayelanga ukubona abantu abathandana ngale indlela elenza ngayo engajayelekanga. Qhubekani lithandana mzukulu!
Sengikhathele ngempilo engiyiphilayo
Umkami mdala kulami ngeminyaka engu-26. Ngamzalela abantwana ababili abangabafana, phezu kwabakhe abane. Ungusomabhizimusi futhi uyasinakekela labantwana. Inkinga yami ngabantu abathi ngamtshadela imali yakhe njengoba laye kafuni ngisebenze ngoba ethi imali kayisilo hlupho.
Loba ngingelahlupho lwemali kodwa ngizwa ngingelampilo. Yena ufuna ngihlale ngingekhaya labantwana, kafuni ngibe labangane futhi kafuni ngiqhubeke ngezifundo zami ngoba uthi kaboni kuqakathekile. Sengikhathele ngempilo engiyiphilayo.
Impendulo
Iminyaka ayitsho lutho. Okubalulekileyo yikuthi abakini labakibo bawubusisa umtshado wenu, liyathandana, liyanakekelana. Khohlwa ngokuthi abanye abantu bathini ngempilo yakho. Ayisibo abatshade lomkakho.
Njengoba selilabantwana kuchaza ukuthi sekulabanye abantu okumele ubacabangele nxa uthatha izinqumo.
Vele kujwayelekile ukuthi abantu abalemali bangafuni ukuthi amakhosikazi abo asebenze. Wena hlala phansi lomkakho likhulume njengemuli. Mhlawumbe lingavumelana ukuthi wena wenze amanye amabhizimisi ukuze uxotshe isizungu.
