Inhlupho zalamuhla

19 Jul, 2018 - 00:07 0 Views
Inhlupho zalamuhla

uMthunywa

Ngehluleka ukumkhohlwa
Ngithemba uphilile Khulu, ngidinga uncedo lwakho. Besengileminyaka emithathu ngithandana lejaha lami.

Kunzima kimi ukuqhubeka ngempilo ngemva kokwehlukana lalo lanxa yena eseqhubekele phambili ngempilo yakhe. Ngenzenjani ukuze ngidlule kukho? Ngehluleka ukuqhubeka ngempilo njengaye.

Impendulo:
Ngiphilile mzukulu, ngibona amakhaza la akhona kulezinsuku. Akukaze kube lula ukwehlukana lomuntu omthandayo. Kodwa ngikholwa kube lezizatho ezilenze lehlukana. Kusobala ukuthi ijaha lakho libone kungcono ukuthi liqhubeke ngempilo yalo ngoba libona ukuthi akukho elingakwenza ukulungisa isimo. Xolisa inhliziyo yakho, ulikhuphe engqondweni, lawe uziqhubekelele phambili ngempilo yakho.

Uhlala ekhuluma ngomkakhe owatshonayo
Sileminyaka emibili sithandana lendoda engiphilisana layo. Unkosikazi wakhe wabhubha kuminyaka emithathu edluleyo. Okungidanisayo yikuthi uhlala ekhuluma ngomkakhe langendlela amthanda ngayo.

Angikaze ngibe lohlupho ngalokho. Uhlupho yikuthi uyasiqathanisa. Kuyangikhathaza kakhulu lokhu futhi sengikhathele ngakho.

Impendulo:
Iminyaka emithathu yisikhathi esincane kwabanye abantu ukuthi bakhohlwe ngomuntu abetshade laye iminyaka. Ngakho kudingeka ukuthi ube lesineke laye. Angikholwa ukuthi akakuthandi ngokukuqathanisa lonkosikazi wakhe kodwa kuchaza khona ukuthi akakadluli ebuhlungwini bokufelwa ngumkakhe.

Ungaqhubeka laye umsekele aze aphole emoyeni wakhe. Kungenzeka lokuthi akaboni ukuthi ukukuqathanisa lomkakhe akukuphathi, mtshele nxa engakwenza lokhu.

Kafuni ukutshada kodwa siyathandana
Ngingowesifazane oleminyaka engu-38 yokuzalwa njalo ngilomntwana. Kulendoda engithandana layo kodwa akazimiselanga ukutshada kukanti mina ngiyawufuna umtshado. Uyakwazi laye lokho kodwa angifuni ukumbamba ngamandla entweni angayithandiyo. Kodwa ngibona sengathi ngiphelelwa yisikhathi njengoba ngingakatholi umuntu engingatshada laye.

Impendulo:
Ayikho iminyaka ebekelwe ukutshada ngakho kawusoze utshiywe yisikhathi. Umuntu akumelanga abanjwe ngamandla ukutshada. Kumele kube yinto evelela ngaphakathi kwakho. Uzakuba khona umtshado isikhathi singafika. Okwakhathesi qhubeka ngokuzithanda, uzinakekele futhi uzihloniphe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds