uMthunywa
Kafuni sitshade emthethwandaba
Sileminyaka engu-20 sindawonye lomkami njalo walobola. Kusele umtshado omkhulu nje kuphela. Ngoba ngibona isimo sethu sezimali ngike ngamcela ukuthi siye bhalisa emthethwandaba. Watshengisa ukungasithokozeli isinqumo sami kwaze kwacina sekulokungazwani phakathi kwethu.
Ngibona ukuthi yena uzitshela ukuthi mina ngibona ukuthi akalayo imali yokungitshada kanti mina bengizama ukumsiza. Manje okungixakayo yikuthi akasakhulumi ngitsho ngomtshado. Asisesihle ngempela isimo phakathi kwethu kodwa manje akekho ofuna ukuphumela obala ngekusasa lethu. Ngenzenjani? Sengicabanga lokutshiya umuzi wami ngoba angisayazi into engiyihlaleleyo.
Impendulo
Izinto zoniwa ngomlomo ziphinde zilungiswe ngawo. Kungenzeka ngempela ukuthi umkakho kakuqondanga kuhle ukuthi uchazani ngendaba yomtshado wemthethwandaba. Okungenzeka ukuthi laye uzitshela ukuthi ukuyatshada emthethwandaba kuzakwehlisa isithunzi sakhe njengendoda. Umtshado omkhulu lingawenza nxa izikhwama sezivuma. Yixoxeni le indaba lingehlukaniswa yinto ebingaxazululeka.
Ngatshadela esontweni kodwa umkami kangisuthisi
Ngitshade ngo-2015 lomkami esontweni njalo umtshado wethu awuvumi ukuthi omunye wethu ajole njalo saze sahlangana sesitshadile. Iqiniso yikuthi angazi ukuthi kuyini okwasihlanganisayo kayisiwo mhlobo womuntu engangifisa ukuqeda impilo yami layo. Akalakho lokukodwa nje okungijabulisayo.
Lokhu ngaqala ukukuzwa ezinsukwini ezimbalwa nje sitshadile, ngabekezela ngoba ngisithi mhlawumbe asikazani kahle. Kodwa kuyangicacela khathesi ukuthi akusilo ubambo lwami lolu, ngiyehluleka ngitsho lokuzenzisa. Usebenzela kwelinye idolobho, uthi nxa ebuyile ngifise ukuthi aluba uyahamba. Okubi nje sesilomntwana. Kangisawuthandi ngitsho umtshado wami kodwa ngingacabanga ngomntanethu ngizwa ubuhlungu ngibe sengihlala phansi. Ngicela ungisize.
Impendulo:
Uma utshada lomuntu, noma ngawuphi umtshado, litshada lobabili selikhulile, lonke lilemibono ehlukeneyo ngempilo. Akula ababili abatshada behle banamathelane masinya. Kuthatha isikhathi ukunamathela kotshade laye. Akekho loyedwa otshadileyo, otshade ubambo lwakhe. Bonke abatshadileyo bafunda ukunamathela omunye komunye nsuku zonke.
Uthando akusi mizwa kodwa ukuthatha isinqumo nsuku zonke ukuthi uzozinikela ngenhliziyo yakho yonke kulo omganileyo.
Khangelisisa ukuthi kuyini ngempela ongakuthandiyo ngomkakho, bese lihlala phansi likhulume. Ungamangala Mzukulu ukuthi laye kukhona angakuthandiyo ngawe, ngoba sonke njengabantu asimsulwa. Ukuhlala lomuntu lithandane lize lehlukaniswe yikufa yisinqumo ozithathela sona wena wedwa kuqala. Uthatha lesi sinqumo uthembise ukuthi uzomthanda lo otshade laye ngaphandle kokunaka amaphutha akhe. Uthi wena enhliziyweni yakho ubudlelwano benu bomtshado buyobuswa yikuxolelana, ukuthula lokwethembana. Ukuthanda umuntu akuzenzakaleli, kuyasetshenzwa.
Abuselamandla ubudoda bami
Ngileminyaka engu-38 yokuzalwa, ngithandana lonkosikazi oleminyaka engu-27. Kunyanga ezimbalwa ezedluleyo uqale ukungethusela ngokutshiya umuzi wethu ngenxa yobudoda bami obungaselamandla. Akukho engingakwenziyo ngekhaya njengendoda, inkinga yinye nje kuphela, yile eyobudoda bami. Sengizame imithi kanye lembiza ezivusa umlilo kodwa kuyala. Ngamthengela imota ngizama ukumehlisa umoya kodwa kawehli ngitsho. Umtshado wami usengozini yokuchitheka, ngenzenjani Khulu?
Impendulo
Mzukulu uphakathi kobunzima. Akusilo phutha lakho ngempela kodwa kumele umzwele noma kunjalo unkosikazi wakho. Kuthatha umuntu oqotho ukuhlala emtshadweni ongelalo ucansi. Khona kuyahlaleka, akuyona into engaze ilenze lehlukane. Okubalulekileyo yikuthi lifunde libe lezinye indlela zokuzijabulisa. Ungavakatshela lodokotela wakho angakuphathisa Mzukulu.
