uMthunywa
Siyahlangana bafundi kule iviki kuzindaba zethu zokukhulisana sisizana ngamacebo ezenzo ezilobuntu .
Ubuntu yiso isiqokoqela sendaba nxa sikhuluma ngempilo yomuntu.
Ukuzihlonipha yinsinda baphenduli yendaba edinga ukucazululwa ukuze njengabafundi siphile kuhle, sifunde kuhle, sibe lekusasa elihle elilenjabulo.
Nxa umuntu ezingenisa engxakini ngezenzo ezilandelayo kalakho ukuzihlonipha yena ngokwakhe.
Nxa sisafunda sikhangelele ukuba isikhathi sethu sisichithe ezingwalweni sibala, sidingisisa ngezifundo ukuze nxa imihloliso isiza siyilobe singelakuthandabuza.
Pho inengi lethu bafundi selingenwa yikungazihloniphi ngokudlala ngasosonke isikhathi.
Umbhalo webhayibhili kwabaseKholose uyatsho ukuba siqaphele ngenkonzo esiyamukela enkosini ukuba siyayenza njalo siyiphelelise.
Phela njengabafundi inkonzo esibhekane layo ngeyokufunda zwi.
Kambe leyonkonzo yokufunda siyayenza njalo siyayiphelelisa na?
Ngilokudana bafundi enhliziyweni ngoba inengi sesilibona liphatheka kabuhlungu ngokubalekela izifundo umfundi ayebonakala ezingosini zelizwe enatha okudakayo.
Ayisikunatha kuphela bafundi ngoba kuyenyanyeka okwenziwa ezingosini lezi.
Abafundi bayabonakala behamba beyiziqumbi besenza okungekho emthethweni ngezikhathi zokufunda.
Kuyesabeka njalo akulobeki phansi ngoba izenzo lezi ziyayangisa njalo ziyadanisa abazali bethu abayibo ababhadala izindleko zesikolo becabanga ukuba umntwana uyafunda kanti usengene kuqula lokunatha lokubhema, asilibali lequla lekhomba khomba yenu le eyenyanyekayo.
Kambe umfundi ogeza agqoke abambe indlela yesikolo kodwa angayifika angabe engumfundi ozihloniphayo na? Umhlaba wona uyawesaba awuhloniphe na?
Bafundi asekeleni ukutshaphaza ikusasa yempilo yethu ngokuzingenisa ezinkingeni zomhlaba.
Umuntu kafunde ukuziphatha ngenhlonipho enkulu, ahloniphe abazali bakhe ngokuya esikolo ngokupheleleyo, aphatheke ekufundeni aze ayephutsha umsebenzi wakhe wokufunda.
Umuntu akenze inkonzo ayidalelwayo kulumhlaba ngalesosikhathi, ayenze ayiphelelise.
Nxa singayi ezikolweni siphelela ezindleleni sigqoke siphelele kambe singaphumelela ezifundweni na? Nxa sibonakala sinatha, sibhema okudakayo kambe singaphumelela na?
Abanye ngabathwala izimpahla ngambili ezikhwameni ukuze bathi bangasithela bantshintshe bagqoke ezangekhaya bakhohlwe nya ngokokufunda!
Awu usizi olunganani ebazalini abasebenza bengalali besebenzela thina esingasesabi umhlaba, esesiphanga umdaka isikhathi singakafiki.
Kubi bafundi kubi! Asikwekeleni singakonakalelwa yimpilo yethu ngoba lezi ezidakayo ziphethisa umuntu esekwelinye izinga lempilo elingaqondisekiyo.
Abadala bathi inyathi ibuzwa kwabaphambili! Asibuzeni singayekeli. Asifundeni ukuzihlonipha .
Asesabeni umhlaba ngoba ulameva ahlabayo othi nxa angakuhlaba kubelobomvu.
Siyacela bafundi asiyeni ezindlini zokufundela njengabantwana abalomthetho.
Ayisibobonke abangazihloniphiyo kodwa lona lelo hlekana eliphambukayo liyenyanyisa.
Lizwisa usizi lidanise abazali abasebenza gadalala bedinga izimali zesikolo.
Ngilethemba lizaguquka bafundi.
