uMthunywa
YiNtatheli kaMthunywa
PHAKATHI kwakho konke okuzenzakala enkundleni ze-Trade Fair ngoMgqibelo, okuzajabulisa uzulu kuzaba ngumdlalo wokudonsana obizwa ngokuthi yi-Tug-of-War oqhutshwa yinkampani yeNgwebu Breweries.
Inkampani yeNgwebu isime yaqina ngalumdlalo ohlanganisa amaqembu ayedlula amatshumi amabili aphuma kuziqinti ezitshiyeneyo kuzo zonke izabelo zelizwe.
Okumqoka lonyaka yikuphumelela kwamaqembu adabuka kumhlubulo ongezansi yelizwe okuyiwo asememethekise udumo lalumdlalo.
Umncintiswano lo uqhutshwa minyaka yonke enkundleni yeZITF grounds ngosuku lokucina kumbukiso wamabhizimusi oweTrade Fair.
Iphephandaba likazulu kuliviki libukele amathimu elungiselela umcimbi wokudonselana intambo, osusiba ngumncintiswano othandwa linengi lalabo abajwayele ukungena eTrade Fair.
Inhlanganiso yeZimbabwe Tug-of-War Federation ibike ukuba isicente inkundla, okuseleyo yikubuthana kwabantu abadinga ukukholisa ukubukela ukuqina kwamaqembu.
Isikhulumi salinhlanganiso uSamkeliso Dlala, ophinda abengumdlali uthe akubizwa ozwayo ngoMgqibelo.
“Isikhona njalo iTug-of-War esekelwa yinkampani yeIngwebu. Kuyasijabulisa ukuthi umncintiswano wethu ukhona njalo ulosekelo. NgoMgqibelo sikhuthaza bonke abalothando lwezemidlalo ukuthi basondele eduzane lenkundla yeTrade Fair bezobona ukuthi lonyaka sibaphatheleni,” kutsho uDladla.
Abalandeli bomdlalo lo abasemalokitshini akoBulawayo bakhulume loMthunywa baveza ukuthi bazayigcwalisa inkundla yeTrade Fair belande ukuyasekela amaqembu akulelidolobho.
KoBulawayo umdlalo weTug-of-War usudlalwa maviki wonke, ikakhulu enkundleni zeSqongweni eLobengula West, eTshabalala, eSizinda laseMinyela.
Okuzahlabusa njalo kulumncintiswano ngokutsho kukaDlala, yikudonselana intambo kwabomama.
Iqembu lekhansili yakoBulawayo lona likhanya lilamathuba amahle okuhluthuna umvuzo kulumncintiswano.
Kusenjalo inkampani yeNgwebu Breweries isikhuthaze amaqembu ukuthi akhuthalele ukuphakamisa abadlali abasakhulayo.
Kwandise ukuthi abadlali beTug-of-War kubengabantu abadala. Kubikwa umdlalo wakuqala uzakuba khona ngehola lika-8 ekuseni esikolo seGifford kuthi emini kube lama-quarter final lamanye amahlandla.
