uMthunywa
Bongani Ndlovu
INKAMPANI ehamba phambili ngezokuxhumana kumakhalekhukhwini i-Econet isisungule iphurojekithi entsha yezifuyo ebizwa ngokuthi yi-Smart Dairy Collar.
I-Smart Dairy Collar iyenzelwe ukuba incedise abalimi ukuthi babekwazi nxa inkomakazi ethile isitshisa ukuze inkunzi zilandele. Lokhu kuzaphathisa abalimi ukuthi bangeqiwa lithuba lokukhulisa izibaya zabo ngokungabi kwazi amalanga okutshisa kwamathokazi abo.
Ekhuluma lentatheli kaMthunywa uMnumzana Simukai Dambuza osebenzela i-Econet uthe amakhola ezifuyo asebenza ukuba akhangele izifuyo njalo ancedise abalimi ukuthi babekwazi nxa amathokazi abo esetshisa.
“Amakhola la ayanceda kakhulu abalimi ngoba ayancedisa ukuthi umlimi abekwazi ukuthi inkomo zakhe zingaphi ngasiphi isikhathi njalo ayaphathisa ukuthi abalimi babekwazi amalanga lapho inkomo zabo ezingamitha khona ukuze umlimi akazwi ukuba lomhlambi omkhulu.
“Amakhola lawa ayancedisa ngoba ayangena ama-SIM card iloba ungaphandle kwelizwe uyabe ubona okwenzakala ngezifuyo zakho nge-Application ebakumakhalekhukhwini wakho okutsho ukuthi ithokazi lingaze litshise ungekho uyafonela umuntu ukuthi ayithumele inkunzi,” kuveza uMnu Dambuza.
Uqhubekele phambili waveza ukuba amakhola la ayancedisa abalimi ukuba bazi okunengi ngezifuyo zabo njalo lendlela abangazincedisa ngayo.
“Ikhola inye ngayinye ilophawu kumbe inombolo ezahambisana lenkomo yakho ukuze ubekwazi ukuzehlukanisa nxa usuthola impumela ngokuziphatha kwenkomokazi yakho kumakhalekhukhwini wakho.
“Amakhola lawa ayasiza ukuba abalimi babekwazi ukuba inkomo ethile idla ukudla okunganani ngelanga, inathe amanzi anganani, ihambe umango onganani kanye lokuba idiniwe kumbe iphumulile okuzakwenza umsebenzi wabalimi ubelula njalo ukhulise izibaya masinya,” kuchaza uMnu Dambuza.
Uphethe esithi amakhola lawa ayintuthuko entsha kubalimi ngakho bona njengenkampani bebesazama ukuzwisisa ukuba bangawasebenzisa njani amakhola la ukuze ancedise umphakathi.
“Okwakhathesi besisebenzisana le-Africa University yeMutare lapho esilenkomo ezinhlanu eziwagqizileyo lawamakhola esisebenza ngazo ukuthi sibe sizilandelela kuhle,” kuphetha uMnu Dambuza.
