uMthunywa
Nkosilathi Sibanda
UMDLALI wenguqu uJuan Mutudza ozadlalela iFC Platinum usedale inkalakatha yendaba, okungenza ukuthi iqembu leli lihluthunelwe inkezo, esivele ingeyayo.
Indaba esegudwini iveza ukuba iqembu leHerentals lidla amahabula ngokuthi umdlali lo, oleminyaka engu-24 yokuzalwa, ngowabo njalo iFC Platinum ayizange ilandele imithetho yenguqu ngesikhathi imthatha ngudlu.
Ngendlela indaba le esihluphe ngayo, izazi labacubunguli bomdlalo babika ukuba iFC Platinum ingathathelwa imiklomelo, iphinde ijeziswe kanzima nxa kungatholakala ukuba iphambanisile.
IHerentals ithe umdlali lo ulokhe engowayo njalo usehlelweni lwabo. Umdlali lo wangena kuqembu lePlatinum ekuqaleni kwesizini njalo ubeyinsika yokuphumelela kweqembu.
Udletshana olufinyelele amaphephandaba luveza ukuba iHerentals yabika ngodaba lolu kunyanga eziyisitshiya galombili ezedluleyo, kodwa ayizange ithole impendulo, ngitsho lakunhlanganiso ye-Premier Soccer League.
Okwamanje kubikwa inkokheli zeHerentals sezifake isikhalazo ngokuloba umbiko kuqula le-Zifa Player Status Committee.
“Silazisa ukuba sesifake isikhalazo ngeqembu leFC Platinum. Isikhalazo yikuthi iFC Platinum yasayina umdlali wethu, uJuan Mutudza ngaphandle kwemvumo yethu,” kutsho lumbiko owathunyelwa mhlaka 5 Mfumfu.
“Sesazama ukukhulumisana leFC Platinum lePremier Soccer League kodwa akukho okuphumayo.”
IHerentals ithe ikholelwa ukuba iFC Platinum yenza iphutha ngoba uMutudza ngowabo.
Iqembu leli licele ukuthi udaba lolu lulungiswe kulandelwa imithetho ngaphansi kwePremier Soccer League Standing Rules and Regulations.”
Isikhulumi sePSL uKudzai Bare wazise iphephandaba leHerald ngoLwesibili ukuba bayizwile indaba le.
