Ethel Ncube
KULENGANE ezimbili zakoBulawayo ezife ngemva kokuwela phakathi kwenkonxa zamanzi ngeviki ephelileyo.
Kuvele ukuba ingane yokuqala elenyanga eziyisificamunwe munye yokuzalwa yelokitshini leNkulumane yayilele embhedeni ngezikhathi zemini ngoLwesithathu yasivuka.
Kubikwa yathi izama ukwehla embhedeni yawela phakathi kwebhavu eyayigcwele amanzi yahle yedlula emhlabeni.
Kuzwakale ukuba unina wosane lolu, oleminyaka engu-36 yokuzalwa walalisa umntanakhe endlini yokulala njalo eceleni kombheda kwakulebhavu yamanzi.
Kubikwa unina wosane wezwa umsindo wokubhudlukela kolutho emanzini wahamba wayakhangela wathola usane seluwele ebhavini njalo lungasatshengisi ukuba lungabe luphila. Wagijimela ekilinika lapho abafika bathi umntwana usedlule.
Kusehlakalo sesibili kulolunye njalo usane olulomnyaka owodwa lweCowdray Park oluwele phakathi kwenkonxa lwafa.
Kubikwa usane lolu, lwalusele loyisekazi oleminyaka engu-25 yokuzalwa yena owalutshiya wayageza uthe ephenduka wathola umntwana ephakathi kwenkonxa yamanzi esedlule emhlabeni.
Omele isikhulumi samapholisa koBulawayo uAssistant Inspector Nomalanga Msebele uxwayise abazali ukuthi bananzelele abantwana zikhathi zonke.
“Sixwayisa uzulu ukuba angatshiyi inkonxa zamanzi eduzane kwabantwana ukuze kuvikelwe ingozi zifana lalezi,” kuphetha uAsst Insp Msebele.